Аякъларыгъызны сууукъ этмезге кюрешигиз

Жаз башы кесекледен аурургъа артыкъда къоркъуулуду. Кюн тийгеннге ышанып, женгил кийип чыгъаса да,  бир кесекден а жел уруп, жауун жаууп башлайды. Ма алай бла ауруйса. Алай болмаз ючюн не этерге керек болгъанын специалистле юйретедиле:

Эшикге чыгъа туруп, жылыракъ кийинигиз. Ышаннгылы  кийимле сизни дарманладан эсе  иги къорууларыкъдыла.

Боюнугъузгъа энчи эс буругъуз - алайы кесеклени бек сюйген жерлериди. Боюнугъузну боюнлукъ бла неда бийик жагъалы жюн кёлек бла кьоруулагъыз.

Мамукъ къумачдан тигилген, тар болмагъан ич кийимле кийигиз.

Аякъларыгъызны сууукъ этмезге кюрешигиз, суу ётмезча мадарла этигиз. Билмей тургъанлай,  сууукъда кёп турургъа тюшген эсе, чындайларыгъызны тышларындан къагъытны чулгъагъыз неда полиэтилен пакетлени кийи­гиз. Алай целлофан затны ичинде аякъларыгъызны бир сагъатдан кёп тутмагъыз.

 Ашыгъызгъа да иги эс буругъуз. Кесекле тийген эселе, диетаны унутугъуз.  Эшикге ачлай чыгъа турмагъыз. Иммунитетни сакълар ючюн этни семизин ашагъыз. Семиз болурбуз деп къоркъмагъыз, адамла продукцияны кесинден угъай, аны къаллай бири ашалгъанына кёре семиредиле.

 Аракъы, тютюн да ичмезге кюрешигиз. Аракъыдан къан тамырла терк окъуна иничкередиле,алгъыннгыладан эсе иничкеле окъуна боладыла.Башхача айтханда ,сиз энди сууукъдан бютюнда бек къыйналлыкъсыз.

 Тютюнню букъусу уа сууукъ бла бирге къан тамырланы бютюнда бек къысады, солууну бузады.

Сууукъ заманда кёзлюклени жюрютмегиз. Алада болгъан ме­талл затла кеслерине сууукъну бек терк аладыла, кёзлени бла бурунну сууукъ этедиле.

Бурунугъуз сууукъ бола эсе, аякъларыгъызны жылытыгъыз.

Аякъларыгъыз, медикле эртте окъуна тохташдыргъанларыча,  солуу жюрюген жерле­ бла байламлыдыла. Ол себепден а кесекле тийип тургъан заманда аланы жылытыргъа керекди. Аны ючюн а ынналаны эрттегили амалларын хайырланыгъыз. Кече чындайларыгъызны ичлерине къургъакъ татыранны къуюп кийигиз. Бек сууукъ болсагъыз, кесекледен сизни неден да бек аякъла­рыгъызны татыран къошулгъан суугъа сугъуп жылытсагъыз, иги болушурукъду.

Аякълагъа ийисли мазьланы, бальзамланы жагъыгъыз. Аланы кючлю ийислери бурунугъуз бла эркин солургъа себеплик этерикди.

Горчичниклени хайырланыгъыз. Ол не заманда да бек тынч эм къыйматлы багъыу амал болгъанды, алай болгъанлай да къалады. Пневмания эм бронхит аурууладан иги болур ючюн, горчичниклени сыртыгъызгъа жабышдырыгъыз. Ларингит болгъан эсегиз а,  боюнугъузгъа салыгъыз.

 Жётел эте эсегиз, кёкюрегигизни баш жанына эм жауурунларыгъызны араларына салыгъыз. Кесеклеригиз бар эселе, тамагъыгъыз ауруй эсе, кёкюрекге эм бутланы балдырларына салып туругъуз.

Эсгертиу: горчичниклени юсюгюзде кёп заманны  тутмагъыз: 15минут озгъандан сора, ала жаланда кюйдюрген этерикдиле ансы, аланы багъыу къыйматлары боллукъ тюйюлдю.

 Эс буругъуз:

Кече 7 сагъатдан аз заман жукълагъан адамла кесекледен 3 кереге кёп ауруйдула. Биринчи этажда жашагъанла уа кесекледен аз ауруйдула. Специалистле айтханларыча, биринчи этаждагъыла лифтни хайырланмайдыла. Лифтни кюбюрюнде ОРВИ ауруула терк жугъадыла. Юслерине кёрлюк кезиулерини аллында тиширыула ОРВИ аурууладан 3-4 кереге кёп ауруйдула. Айтып ангылаталмазча быллай бир иш да барды. Тинтиучюле тохташдыргъанларыча , огъурсуз, кир ниетли, ёпкелеучю адамла бирси адамладан эсе кёп ауруйдула.