Спортчуларыбыз – эм кючлюлени санында

Рязаньда тхэквондодан  «Кубок Рязанского Кремля» деген аты бла жаш спортчуланы араларында эришиу къуралгъанды. Аны биринчи кюнюнде, алтышар сермеш бардырып, кюмюш майдалланы Созайланы Артур (37кг.) бла  Казбулат Казанчев (49кг.) къытхандыла. Камбулат Гусейнов бла Басир Шогенов да, тюбешиулерин жетишимли бошай келип, жарымфинал ючюн сермешледе къытдыргъандыла.

 Кубокну экинчи кюнюнде къарыуларын 1 мингден аслам адам сынагъандыла, хар ауурлукъ къауумда 64-шер спортчу сермешгендиле. Быллай болумлада къызларыбыз 3 майдал алгъандыла. Биринчи жерден бир атламда къалып, «кюмюшге» Геграланы Дарина (47кг.) тийишли болгъанды. Диана Иванова (33кг.) бла Эстелла Пшихачева (37кг.) доммакъ майдалла бла къайтхандыла.

Бу кубок Россейни биринчилигине къатышыргъа онг береди, анга бизни республикадан битеу да 12 адам баргъан эдиле.