Миллетлени маданият хазналарыны байлыгъын кёргюзтген байрам

Бу кюнледе Къазан шахарда Волжск Булгария ислам динни алгъанлы 1100 жыл болгъаны бла байламлы къууанчлы жыйылыула бардырыладыла.

 Ол байрамгъа аталып кёп тюрлю тюбешиуле, ол санда «Россей  бла ислам дуния» деген къауумну стратегиялы кёрюмдюсюню жыйылыуу,  «Миллетлени  маданият хазналарыны байлыгъын, халкъланы эм дин конфессияланы араларында  бирликни бла келишиулюкню сакълауда россейли сынау» эм он ючюнчю «Россей бла ислам дуния» деген халкъла аралы экономика саммит да боллукъду.

Байрамгъа аталгъан къууанчлы жыйылыулагъа Къабарты-Малкъар Республиканы Башчысы Казбек Коков, РФ-ни Къырал Думасыны депутаты Геккиланы Заур, КъМР-ни Правительствосуну Председателини орунбасары Сергей Говоров, КъМР-ни эл мюлк министри Хасан Сижажев эм КъМР-ни промышленность, энергетика эм сатыу алыу министри Шамиль Ахубеков къатышадыла. Аны юсюнден КъМР-ни экономика айнытыу министерствосуну пресс-службасы билдиреди.

КъМР-ни Башчысы «Россей бла ислам дуния» къауумну стратегиялы кёрюмдюсюню эм «Миллетлени  маданият хазналарыны байлыгъын, халкъланы эм дин конфессияланы араларында бирликлерин  бла келишиулюкню сакълауда россейли сынау» деген жыйылыугъа къатышырыкъды.

Битеу да «Россей бла ислам дуния» саммитни ишине 63 тыш къыралдан бла   52 россейли  региондан келечиле къатышадыла. Алагъа алгъыш сёзню РФ-ни Правительствосуну Председатели Михаил Мишустин ийгенди, аны пленар жыйылыуда РФ-ни экономиканы айнытыу министри Максим Решетников окъугъанды.

 «Россейни бла ислам къыралланы шуёхлукъ байламлыкълары къатыды эм бир-бирге хурмет этиу да уллуду. Биз сатыу-алыуда, экономикада, илму-техника эм гуманитар жаны бла да байламлыкъланы дайым жюрютебиз, жашауда уллу проектлени да бирге бардырабыз. Бек ышанама,  он ючюнчю «Россей бла ислам дуния» деген халкъла аралы экономика саммит, мындан ары да иш байламлыкъланы кючлерге, къыралланы эм алада жашагъан халкъланы араларында ангылашыулукъну сакъларгъа себеплик берлигине»,- деп айтылады М. Мишустинни алгъыш сёзюнде.

 Саммитни кезиуюнде тюрлю-тюрлю темала сюзюллюкдюле, ол санда «тёгерек столла» эм машинала ишлеучю бёлюмге, халалгъа саналгъан ашарыкълагъа, ислам финанс системаны амалларына, предпринимательлик ишге эм инвестициялагъа  жораланнган жыйылыула да боллукъдула. Форум 21 майда жабыллыкъды.

Бизни корр.