Музыкагъа сюймеклигинден сабийлеге юлюш эте

«Ол,  фортепианону артында олтуруп, ариу  классика музыканы согъа эди. Биз, сабийле, анга сюйюп тынгылай, Галина Александровнаны алай уста сокъгъанына  сукъланыучу эдик. Ол а, ишине битеу эси кетгенден, бизни анга къарап тургъаныбызны эслей окъуна болмаз эди», - деп хапар айтханды манга бир танышым. Ма андан сора мен аны юсюнден газет окъуучулагъа да хапар айтыр мурат этип, аны бла тюбешген эдим.

Галина  Александровна Атабиева кесини жашауун, къадарын да музыка  бла байламлы этгенди. Сабийлени анга сюймекликлерин  ёсдюре, кесини жюрек  жылыуун да алагъа бере, отуз жылны ичинде ишлей келгенди. 1975 жылдан башлап а Огъары Малкъарда  Абайланы Солтанбекни  атын жюрютген  сабий  музыка школуна директорлукъ этгенди.

Сабий заманында, Узакъ Востокда жашагъан кезиуюнде окъуна, сюйген эди гитче сарычач къызчыкъ музыканы. Атасы, Совет Аскерни офицери, аны музыканы сюйгенин бек жарата эди.

Юйюр Азербайджанны Кировобад шахарына кёчгенинден сора, ол Галинаны музыка  училищеге береди. Андан ары  уа къыз билимин Къабарты-Малкъарда ёсдюргенди. Галина Александровна 1971 жылда Нальчикде  музыка  училищеге окъургъа киреди эмда 1975 жылда аны  айырмалы бошайды. Ол жыл окъуна Огъары Малкъаргъа ишлерге барады. Анга уа анда жарыкъ тюбегендиле. Бу  жерли  адамланы къонакъбайлыкъларына сейир эте, къууанып ишлей, музыка школну башчысы да болады. Ол жашауун музыкасыз кёрмегенди бир заманда да.

Музыканы мен энчи сюйгенме, - деген эди ушакъ нёгерим. - Ол мени жюрегимде окъуна согъулуп тургъанча кёрюнеди. Белгили жырда айтылыучусуча, музыка манга ишлерге, жашаргъа да болушханды. Кесими анга сюймеклигими сабийлеге да бералгъан эсем, сора мен насыплыма. Андан сора да жашчыкъланы бла къызчыкъланы аккордеонда бла фортепианода согъаргъа, хорда жырларгъа сюйгенлерине да къууаннганма. Бек игиси уа аланы бу ишге кёллери  тартханы эди. Ол заманда музыка школгъа элли  сабий  жюрюгенди. Ала   музыканы теориясын да билирге  сюйгендиле. Сохталарымы бек ахшыларыны санында Кетенчиланы  Лейланы, Жангуланланы Асиятны  (аккордеонда), Къужонланы Жаннетаны, Киштикланы  Асанны (фортепиано классда) эмда башхаланы атларын айтыргъа боллукъду. Аланы музыка  хунерге юйретиуге уа устазла Польшина Марина бла Байсыланы Зухура заманларын, билимлерин да аямай кюрешгендиле. Зухура да бизни школда окъугъан эди.  Кесини  ишин билген ахшы специалист болгъанды. Аны бла бирге ишлегениме да бек къууанама. Бу мен атларын сагъыннган педагогла кеслерини иш кёллюлюклери бла айырмалыла эдиле, - деп хапарлай эди музыкадан устаз.

 Галина Александровна Атабиева, музыканы иги сокъгъаны бла къаламай, ариу  да жырлай эди. Сабийле аны бек сюйгендиле. Нек дегенде, ол таза ниетли, халал  жюрекли адамды.  Керек  заманда кимге да  болушлукъ этерге ашыгъыучуду.  Ол  школда директор болуп ишлеген заманында музыка инструментлени эскиликлери Галина  Александровнаны бек жарсытып тургъанды.

 «Терк-терк ремонт этдирирге да кюрешебиз. Болсада ол алай кёпге жетмейди. Аланы  жангыртыргъа  кереклиси кёрюнюп турады. Алай ахча жетишмейди. Тамамланыргъа керекли жумушла  кёпдюле. Музыка школубузгъа ремонт этип бошаялмагъаныбыз себепли, алыкъа больницаны  мекямында турабыз. Республиканы бюджетинден бёлюннген ахчагъа тёрт кабинетни тап жарашдыргъанбыз. Болсада коридорубузгъа эм школну башына ремонт этерге керекди. Бери  алыкъа газ  тартылмагъанды, кёмюр да жокъду. Элни администрациясы болушлукъ этерге айтады», - деп жарсый эди  иги кесек жыл мындан алгъа Галина Александровна.

Болгъан битеу чырмаулагъа да къарамай, школда жыл сайын отчёт концертле бардырылып тургъандыла. Бери  ата-анала, республиканы Культура эм информация коммуникацияла министерствосундан, районну культура бёлюмюнден къонакъла келип да тургъан эдиле. Жылгъа бир кере мында окъугъанла  район арада бардырылгъан отчёт концертге да къатышхандыла. Галина Атабиеваны башчылыгъында  Огъары Малкъарны музыка школуну хору 2004 жылда диплом бла саугъаланнганды.

Таматала бла сабийле байрамгъа бирге хазырлансала  уа къууанчны чеги  жокъ эди. Музыкалы школгъа жюрюгенле 23  февралгъа, 8 мартха, Сабийлени къоруулауну халкъла аралы кюнюне, «Жылны кезиулерине», дагъыда кёп башха байрамлагъа аталгъан концертлеге бек сюйюп къатышхандыла. Март айда  уа Малкъар халкъны жангырыууну  байрамына  ала бютюнда бек сюйюп къатышхандыла. Бир бирлерин алгъышлай, устазла, сабийлеге кёп ахшылыкъла тежегендиле.