Нодулярный, башхача айтханда, узелковый дерматит, бек къыйын ауруугъа саналады. Ол адамлагъа къоркъуулу тюйюлдю, хатасы жаланда маллагъа жетеди. Ветеринар специалистле айтханларына кёре, бу инфекция терк жайылгъанладан бириди, кеси да малчылыкъгъа уллу заран салады: анга жукъгъан тууарланы ондан бири къырылыргъа боллукъду. Алай ауруу уллу къоранчла келтиргени бла да белгилиди: малланы сютлери азаяды, ала арыкъ боладыла, ийнекле тёлю келтиралмай башлайдыла.

Нодуляр дерматит биринчиден Африка  къыраллада жайылып башлагъанды. Бизни къыралда уа талай жыл алгъа табылгъан эди. Специалистле билдиргенлерича, аурууну биринчи белгилери 3-30 кюнню ичинде ачыкъланып тебирейдиле, асламысында уа бир ыйыкъны неда он кюнню ичинде эсленедиле. Къарыусуз малланы ол онгларын бек алады. Аланы къалтырауукъ алады, ала къыйын солуйдула, ичлери ётеди, терилери чапырады, юслеринде саргъылдым къотурла чыгъадыла, ызы бла ала ирин этип башлайдыла. Быллай малланы кёзлеринде да жарала чыгъадыла, ауузларындан бла бурунларындан а шыты келеди.

Айтханыбызча, бу ауруу бек къоркъуулуду, аны тюзюнлей багъыу амалы шёндю жокъду. Алай аны къутхарыр амалла уа бардыла. Ырахын малланы энчи препаратла бла багъадыла, саулукълуланы уа дерматитге чыдамлы болурча этедиле.

Быллай заранлы затха тюбемез ючюн, бек биринчиден, профилактика амаллагъа уллу кёллю болмазгъа тийишлиди. Ол санда маллагъа кезиуден кезиуге тынгылы къараргъа, халлерин тинтирге, ишекликге тюшгенлени башхаладан энчи (карантинде) тутаргъа, къоркъуулу регионладан тууарла неда малчылыкъ продукция сатып алмазгъа, аурууну жайгъан затлагъа къажау ишни да дайым бардырып турургъа керекди.

Дарман салыу да къыйматлы амалгъа саналады. Аны юч айлыкъларындан салып тебирейдиле, кесин да - хар жыл сайын къайтарып биришер кере. Ол сюрюуню нодуляр дерматитден ышаннгылы сакълайды, дейдиле специалистле.

Малда бу аурууну белгилери эсленип тебиреселе, неда тууарла сунмай тургъанлай къырылып башласала, аны юсюнден регионну неда районну ветеринария службаларына билдирирге керекди.