Тегенеклиде – Владимир Высоцкийни музейи

 Гитче тау эл – Тегенекли – Бахсан сууну башында орналгъанды, 1997 жылда анда туристлеге, экскурсантлагъа да сейир объект – Владимир Высоцкийни музейи - ачылгъанды.

Жырчы, композитор, бард Высоцкий битеу къыралгъа Минги тауда жигит, затдан къоркъа билмеген къаячылагъа аталгъан «Вертикаль» художестволу фильмге тюшегенинден сора бютюн белгили болгъанды. Анда ол баш жигитледен бирин ойнагъанды, алай къараучула бегирекда аны керти шуёхлукъну, къыйын болумгъа тюшген адамланы араларында байламлыкъланы юслеринден жырларын жаратхандыла.

 Фильмни алдырыугъа уучулукъ жаны бла профессор, альпинизмден сыйлы тренер Залийханланы Хусейн себеплик этгенди, ол кезиуде Хусейн Высоцкий бла да шуёхлукъ жюрютюп башлагъанды. Андан сора ол, тюрлю-тюрлю экспедициялагъа къатыша, турист эм альпинист организациялагъа кире, жырчыны суратларын, пластинкаларын, башха затларын жыйып тебирегенди. Аз-аздан экспозициягъа жангы экспонатла табыла башлагъандыла, алай бла Хусейн Чоккаевич музей къураргъа, ол жыйгъан затланы хар инсан да кёрюрча этерге сюйгенди.

 В.С. Высоцкийни музейини мекямы кеси да сейир материалдан ишленнгенди – къатхан вулкан лавадан. Стендлеринде бла витриналарында айтхылыкъ бардны жашау эм чыгъармачылыкъ жолуну юсюнден хапарлагъан китапла, суратлары, къолдан жазмалары бардыла. Араларында алгъыннгы юлгюле бла жарашдырылгъан альпинист экипировка турады, къабыргъаланы Залийхан улу жыйгъан уучу трофейле, жаныуарланы бодуркъулары, жер-жерли табийгъатны тамашалыгъын белгилеген экспонатла жасайдыла.

  Музейде болгъан Минги таугъа биринчи ёрлеген адамланы, 1942-1943 жыллада Приэльбрусьеде

 Уллу Ата журт урушну сермешлерини юсюнден ёп жангы зат билликди. Музейни къурагъанны сейир жашаууну юсюнден коллекция да энчи сейир къозгъайды.