Къыйматлы тюбешиу, ачыкъ ушакъ

 КъМР-ни Башчысы Казбек Коков Сангырауланы битеуроссей биригиулерини (ВОГ-ну) президенти  Станиславом Иванов бла ишчи тюбешиу бардыргъанды.  ВОГ-ну таматасы бизни республикагъа  «Сангурауланы битеуроссей биригиую» жамауат организацияны Къабарты-Малкъарда бёлюмю къуралгъанлы 85 жыл толгъаны бла байламлы  жумуш бла келгенди.

Тюбешиуню кезиуюнде къулакълары иги эшитмегенлени бек магъаналы  соруулары сюзюлгендиле, бу ишни игилендириуню амаллары белгиленнгендиле. Ушакъгъа дагъыда КъМР-ни Правительствосуну  Председателини орунбасары Марат Хубиев, КъМР-ни урунуу эмда социал къоруулау министри Асанланы Алим, ВОГ-ну Краснодарда регион бёлюмюню таматасы Эдуард Джерештиев, ВОГ-ну Къабарты-Малкъар регион бёлюмюню председатели Мурат Ахаминов, сурдопереводчик Нина Кузамышева да къатышхандыла.

Тюбешиуде билдирилгенича, бюгюнлюкде республикада къулакълары иги эшитмей неда эшитмей диспансер эсепде 598 абадан адам бла 539 сабий турадыла. Алагъа саулукъ сакълау, социал къоруулау жаны бла да къырал жумушланы барысы да этиледиле. Къулакъ аурууланы эрттеден ачыкълау жаны бла иш бардырылады. 2021 жылда 3 мингден аслам саусузгъа, ол санда 622 сабийге, къаралгъанды. Федерал клиникалагъа кохлеар имплантация бардырыугъа 16 адам жиберилгенди.

Къабарты-Малкъарда Энчи (коррекциялы) школ-интернат ишлейди. Анда 68 сабий окъуйду. Ала бла сынаулу эмда уста педагогла бла специалистле ишлейдиле. «Билим бериу» миллет проектни хайырындан учреждениягъа 7 миллион сомдан асламгъа энчи оборудование алыннганды.

Республикалы спорт-адаптив школгъа къулакълары иги эшитмеген 15 сабий жюрюйдю да, аланы жетишимлери сейир этдиредиле. Сёз ючюн, 2020 жылда Азамат Токманов, кесичаланы арасында эрише, Россейни эркин тутушуудан чемпионатында хорлагъанды. 2021 жылда  Мадина Сатушуева тхэквондодан дунияны чемпиону болгъанды, Татьяна Жилова уа доммакъ майдал алгъанды.

 Къулакълары иги эшитмеген адамлагъа профессионал билим бериу, артда уа ишге салыу – магъаналы жумушладан бириди. Арт 3 жылда спорт-адаптив школну бошагъан 24 адам орта профессионал билим берген энчи окъуу юйлеге киргенди. ВОГ-ну регион бёлюмюню бла Къабарты-Малкъар къырал университетни араларында профессионал билим бериуге себеплик этиу жаны бла бирге ишлеуню юсюнден келишим этилгенди. Иш бла жалчытыучу арала уа инсанланы ол къауумун ишге салыуну къайгъысын кёредиле, кеслери ие болгъан иш ачаргъа да болушадыла.

Тюбешиуню кезиуюнде бармакъла бла «сёлешиуню» кёчюре билгенлени хазырлаугъа, социал-маданият, физкультура-спорт, экскурсия-туризм ишлеге саулукъларында кемчиликлери болгъанланы не къадар кёп къатышдырыугъа да энчи эс бурулгъанды.

Казбек Коков Сангырауланы битеуроссей организациясыны келечилерине къулакълары иги эшитмеген недаахыры да эшитмеген адамланы жашауларын игилендириуге бурулгъан ишлери ючюн жюрек ыразылыгъын билдиргенди. Ол сакъатла бла ишни кючлендирирге, тюбешиуде эшитилген кемчиликлени кетериу, туура этилген амалланы хайырланыу жаны бла мадарла этерге буюргъанды.