Адамлагъа таплыкъгъа

Битеуроссей халкъ фронтну (ОНФ) Къабарты-Малкъарда бёлюмюню келечилери Нальчикде микрорайонладан биринде темир жолну бирси жанына элтген жолчукъну жангыртырча этгендиле. Ары дери гражданла алагъа ОНФ-ни мобильный приложениясы бла жазып, ол тийреде мадар этерча болушлукъ излегендиле. Жамауатны келечилери жерине барып къарагъандыла, адамла бла ушакъ этгендиле. Гражданла айтханларына кёре, бу жолчукъ Искож бла Александровка микрорайонланы арасында ишленнгенди, кеси да адамлагъа бек тапды. Социал инфраструктураны асламысы (тюкенле, поликлиника, школла, сабий садикле, сквер) Искожда болгъаны ючюн, бу жолчукъну абаданла, школчула да терк-терк хайырланадыла.

«Аш-азыкъ рынок да Искожда турады. Александровкада жашагъанла кёп къалмай бары да, абери сатып алырча, ары барадыла. Андан къайтып келгенде уа, къолларына уллу хуржунла да алып, темир жолну юсю бла ётедиле. Къышда уа алайы бютюнда къоркъуулуду, кеси да учхалауукъду», - дегендиле гражданла.

«Биз аны юсюнден «Россейни темир жоллары» компанияны Шимал Кавказда бёлюмюню администрациясына билдиргенбиз. Алайгъа талай заманда сора къайтып келгенибизде, энди хар неда тап болгъанын кёргенбиз», - дегенди ОНФ-ни «Жашау журтла эмда шахар болум» бёлюмюню эксперти Вероника Зимак.

Ол айтханнга кёре, жолчукъну эки жанында асфальт да салыннганды. Кеси уа къангала бла тюзетилгенди. Дагъыда алайда къоркъуусузлукъ белгиле орнатылгъандыла. Бу ишге шахарны администрациясы да къатышып себеплик этгенди.