Республиканы Спорт министерствосунда Россейни ММА-дан биринчилигине хорлагъан жаш спортчула бла тюбешиу болгъанды, аны ведомствону башчысыны орунбасары Аналаны Аслан бардыргъанды. 

Аналаны Аслан спортчуланы, аланы тренерлери Руслан Шухостановну бла Алим Мешевни, регионну къатыш единоборстволадан федерациясыны президенти Залим Пшуковну эришиуледе жетишимлери бла алгъышлагъанды эм мындан арысында да хорламлы болурларын тежегенди.

 Тренер, «ФайтЗона» спорт клубну директору Алим Мешев а аланы алда къаллай турнирле сакълагъанларыны, хазырланыу къалай баргъаныны юсюнден билдиргенди.

 Эсигизге салайыкъ, эришиу Омскда ётген эди, анда Аппайланы Амир (57 кг), хорлап, Россейни жыйымдыкъ командасына киргенди, Тамерлан Кармоков (32 кг) бла Имран Мансуров (57 кг) доммакъ майдалланы алгъандыла.