Огъурлу Афар

Кёзден кетген кёлден кетеди, дейдиле. Алай жашауда атын иги бла айтдыргъанла уа  унутулмайдыла.  Аланы таныгъанла, жууукъла, туугъанла, туудукъла эсгергенлей турадыла. Мен бу хапарымда сагъынырыкъ аллай адамладан бири Улбашланы Афарды. Чынтты таулу  эр киши, заманын бошуна оздурмагъан.

Афар туугъан элин  бек сюйгенди. Мени Къашхатауум деп аны атын бал татууун келтирип айта, дунияны ахшылыкълары анга жаугъан сунар эди.

Халкъыбыз Азяидан къайтхандан, сора мюлклени жангыртыу ишле башланнгадыла. Афар Къашхатауда   «Къызыл Малкъар» колхозда жерчилик бригадагъа кёп жылланы башчылыкъ этип тургъанды. Колхозда  нартюх, будай, кёгет, жемиш ёсдюргенди.

1969 жылда Афарны бригадасы, мирзеу ёсдюрюп, районда биринчи жерни алады. Аны ючюн анга «За трудовую доблесть»  майдал бергендиле. Кесин да гитче самолёт бла  районну тийресинде учургъандыла.

Афар жамауат аллында уллу даражасы жюрюген адам эди. Къуллукъчула да анга хурмет этгендиле. Элге уллу къонакъ келсе,  оноучула аны Улбашланы юйлерине элтип болгъандыла. Мухар бёркю бла башында,  Адар алагъа хар заманда  бет жарыкълы тюбегенди.

Юй бийчеси Халимат а, кёзню жумуп ачхынчы,  сары жауда  «жюзе» тургъан хычинлени, жууурт айрандан толу гоппанланы салыр эди алларына. Ненча алгъыш айтылгъан болур эди ала жашагъан юйде!

Кёп жылла озгъандыла бу эки адам дунияларын алышханлы. Алай аланы атлары адамланы эслеринде къалгъандыла. Халимат биширген татыулу ашланы ашагъанла, Афарны акъыл сёзлерине тынгылагъанла аланы атларын дайым хурмет бла эсгередиле.

      

 

 

 

Османланы Хыйса.
Поделиться: