Аварияда ачыгъанлагъа тийишлисича медицина болушлукъ бериледи

КъМР-ни Башчысы Казбек Коков Учебный элни тийресинде аварияда ачыгъан сабийлеге медицина болушлукъну бериуню энчи контрольгъа алгъанды. 

Авария, ингирликде 18 сагъатха жууукъ, Прохладна районну Учебный элинден узакъ болмай, эки автомашина Mercedes-Benz GLS эм Форд Транзит бир- бирлери бла къагъышханларыны хатасындан болгъанды.

Ал билдириулеге кёре Форд автомашинада 10 адам болгъанды, ол санда беш сабий. Экинчи автомашинада 2 адам, ол санда бир сабий. Сабийлени эм гитчесине бир жыл бла жарым болады, таматасына 18 жыл толгъанды, деп билдиргендиле республиканы оноучусуну пресс-службасындан.

Республикалы клиникалы больницагъа авария болгъан жерден 10 адамны элтгендиле, ары КъМР-ни саулукъ сакълау министри  Рустам Калибатов да баргъанды. Тюрлю-тюрлю жарала алгъанлагъа больницада тийишлисича къарайдыла.

КъМР-ни саулукъ сакълау министерствосу билдиргеннге кёре, бир сабийни  жаралары къыйын  болгъаны  себепли, Республикалы сабий клиникалы больницагъа кёчюргендиле.  Къалгъан сабийлени халлери не халда болгъаныны юсюнден билдириу боллукъду.  Авариягъа тюшгенлеге кереклисича медицина болушлукъ бериледи, деп айтылады билдириуде.

Бизни корр.