Трассагъа ремонт этиледи

«Къоркъуусузлу эмда качестволу автомашина жолла» деген миллет проектни чеклеринде, Куба-Малка трассаны жети километрлик кесегине тынгылы ремонт этиле турады. Республиканы Транспорт эмда жол мюлк министерствосундан билдиргенлерине кёре, ол Малканы ичинде участкасыды, кеси да Куба, Псыхурей эм Кременчуг-Константиновское элле таба элтеди. Ахыргъы кере аны он жыл мындан алгъа жангыртхан эдиле.

Шёндю подряд организацияны ишчилери жолну къырып, мурдорун хазырлау бла кюрешедиле. Аны бошагъандан сора тротуарланы жарашдырлыкъдыла, чыракъла, белгиле да орнатырыкъдыла. Ишлени барын да быйыл тамам этерге таукелдиле.

Камераланы санына къошулгъанды

«Къоркъуусузлу республика» къырал учрежденияны башламчылыгъы бла регионну жолларында энтта да юч камера орнатылгъанды: Тырныауузда, Элбрус эм Къарагъач элледе. Ала орамланы кече, кюн да видеогъа тюшюрюп, жамауат къоркъуусузлукъну жалчытыргъа себеплик этип турлукъдула, деп ышандыргъандыла ведомствода.

Анда айтханларыча, быллай камераланы санына аз-аздан къошула барлыкъды. Специалистле аланы аслам халкъ жыйылыучу жерледе, социал учрежденияланы, школланы, сабий садиклени, административ мекямланы, сатыу-алыу араланы къатларында орнатадыла.

Жолчуланы харкюнлюк ишлери

Жаз башы келип, хауа да жылыннганы бла, жолчуланы харкюнлюк ишлери башланнганды.  Республиканы кёп жерлеринде ала жоллада чунгурланы жамайдыла, белгилени бояйдыла, тозурагъан затланы жангыртадыла. Дагъыда жол жанларында ёсген кырдыкны чалып кетередиле. Республиканы Транспорт эмда жол мюлк министерствосунда айтханларына кёре, бу ишледе онбеш машина хайырланылады, техника жетишеди.