Батыр сапёр

Тохаланы Сюлейни жашы Ануар фронтха 1941 жылны июнь айында чакъырылгъан эди. Ол минно-инженер аскерлеге тюшгенди. Аны уруш жолу уа Сталинградда башланнганды. «Анда минала, атылмай къалгъан топ окъла болмагъан бир жер жокъ эди. Биз а аладан бизни аскерибиз бла техникабыз ётерик жолну тазаларгъа керек болгъанбыз»,-деп эсгергенди Ануар.

Ол бла аны аскерчи нёгерлери, жашауларына уллу къоркъуу тюшюп тургъанлай, алгъа излеу ишле бардырып,  миналаны бла топ окъланы табып, аланы чачдыртып, бизни алгъа ёшюн уруп келген аскерлерибизге жолну тазалагъандыла.

Аллай кезиуледен биринде Ануар ёлюрге аздан къалгъанды.Атылыргъа хазыр болуп тургъан минаны бир такъыйкъаны ичинде бир жанына атханлай, ол узакъ бармай чачылады да, алайда Ануар ауур жаралы болады. Аны бизникиле фашистледен тазалагъан Калач шахарда госпитальгъа жетдиредиле. Андагъы врачла сау ыйыкъны кюрешгендиле аны ёлюмден къутхарыр  ючюн.

Иги болгъандан сора уа,  ол  биягъы  фронтха кетеди, Сталинград ючюн къызыу сермешледе,  Курск дугада, Харьков ючюн къазауатлада жигитлигин кёргюзтгенди, Днепр суудан душман окъла атыла тургъанлай ётгенди, алай бла Берлиннге дери жетгенди. Ма мында да миналадан атлар къарыу болмагъан шахарны аладан тазалаугъа къатышханды.

Каменкадан жигитибиз урушну 1945 жылда 9 майда фашистлени ара шахарында бошагъанды. Аны батырлыгъына бла кишилигине  тийишли багъа берилгенди: ол Къызыл Жулдузну ордени, Къызыл Байракъны аскер ордени, Уллу Ата журт урушну биринчи даражалы ордени, «За отвагу», «За боевые заслуги», «Сталинградны къоруулагъаны ючюн», «Шимал Кавказны азатлагъаны ючюн» майдалла бла саугъаланнганды.

Урушдан сора да Ануар, Ата журтну буйрукъларын толтура, кесини бай  сынамына  жаш аскерчилени юйретгенди. Аскерден ол жаланда 1947 жылда къайтханды эмда олсагъат мамыр урунуугъа киришгенди, юйюр къурагъанды, тёрт адепли сабий да ёсдюргенди.