Сабийлени эслерин бийлерча, мадарла этеди

 Тырныауузну 1-чи номерли лицейини школгъа дери билим бериу «Алёнушка» бёлюмюню юйретиучюсю Маммеланы Фатима ишин сюйгени, аны тынгылы тамамлагъаны бла белгилиди. Анга  устаз Элбрус районну атындан республикалы эришиуде «Живое образование» проекти бла жетишимли болгъаны да шагъатлыкъ  этеди.

Фатима Исхаковна Шёндюгюлю гуманитар академияны тауусханды, психология жаны бла билим алгъанды. Сабийле бла ишлеуге  анга бу усталыгъы да себеплик этгенди. Ызы бла ол сынамын Профессионал айныуну республикалы арасында «Школгъа дери эм коррекциялы-айнытыу билим бериуню педагогу» деген курсну ётгенди. «Сабийлени юйрете, кесим да юйренеме эм сабийликни жангыдан сынайма», - дейди Фатима Исхаковна. Билим бериу организацияда ишигизни жаратамысыз деген сорууубузгъа: «Сабийлени къатында кесинги да жаш, жангы кюч келгенча, тири болгъанча сезесе. Аланы  жетишимлеринде къыйынынг болгъанын  кёрсенг, айхайда, учунаса. Аны ючюн а къуру да чыгъармачылыкъгъа талпынаса, эм сейир  эм хайырлы материалланы табаргъа кюрешесе», - деп жууаплайды.

-Фатима Исхаковна юйретиу ишге кёлю бла бериледи, бир амалны  къайтарып турмайды, энчи  ызы барды. Жууаплыды, башха адамны, бютюнда уа сабийни, оюмуна тынгылай, хурмет эте биледи. Ол ишлеген къауумда сабийле хар не жаны бла айнырча онгла къуралгъандыла, «Театр ойнайбыз», «Зауукълу конструктор» арала, «Художестволу чыгъармачылыкъны арасы», гитче-лаборатория ишлейдиле. Алада школгъа дери билим бериуню федерал къырал стандартына кёре тюрлю-тюрлю материалла жыйылгъандыла, ала дайым жангыртыладыла.

Мында сабийлени эслерин бийлерча, хар бала да хунерине, сейирлерине кёре жубанырча  мадарла этилгендиле. Школчула айнытыу аралада не бла кюрешириклерин кеслери сайлайдыла, тёгерекдеги дуния бла шагъырейленедиле», - дейдиле учрежденияны башчылары.

Маммеланы Фатима иш кёллю, намыслы адамча белгилиди. Коллективде нёгерлери бла арасы ариуду, дерслеге тынгылы хазырланады, оюн технологияланы хайырлана, тёгерегинде тынч, огъурлу болумну къурай биледи. Сынамын ёсдюре, учрежденияны методика ишине да тири къатышады, аны чегинде «Къошакъ билим бериуде федерал билим бериу стандартха тийишлиликде айнытыу предмет-юйретиу болумну къурауду эм игилендириуде инновациялы амалла» деген докладны хазырлагъанды. «Элбрус районну жаш педагоглары» ассоциациягъа, жаш специалистлени билимлерин ёсдюрюу бла байламлы проектлени жарашдыргъан чыгъармачылыкъ къауумгъа киреди.