Байрамгъа атап

Бу кюнледе республиканы  Владимир Вороков атлы маданият фонду «Бизни Ата журтубуз- Россей» деген ат бла талай  иш бардырады. Аладан бирлери  Нальчикде  2-чи номерли  «Ивушка»  сабий садда  кечиннген жашчыкъланы,  къызчыкъланы да къатышыулары бла   къуралгъанды.

Фондда ишлегенле сабий садха баргъандыла, анда  къонакълагъа  аскер кийимле кийген къызчыкъла бла жашчыкъла жарыкъ тюбегендиле.  Фондну       председатели Люаза Макоева  уа  сабийлеге  кёп сейирлик хапарла айтханды.    Ала  андан Россей кёп миллетли къырал болгъаныны, бизни гитче Ата журтубуз- Къабарты-Малкъарда да кёп миллетлени эмда динлени келечилери  шуёхлукъда, бир бирни ангылап жашагъанларыны юсюнден  айтханды. Аны бла бирге ол Маданият фондда  онеки культура ара, беш жамауат организация эмда биригиуле  ишлегенлерин да билдиргенди.     

-Ёсюп келген тёлюлени келечилерин  ниет- къылыкъ жаны бла юйретиу,  Маданият фондну  баш борчларындан бириди. Аны бла байламлы бизни  фонд,  республикада болгъан   миллет культура  арала бла  бирге  «Бизни Ата журтубуз –Россей»  деген ат бла   РФ-ни Президенти Владимир Путиннге  кертичиликлерин билдириу жаны бла акциягъа ,  «Терезеде байракъ» деген    флэшмобха, Уллу Ата журт урушда Хорламны 77-жыллыгъына атап  «Эсгериуню терек бахчасы» деген  халкъла аралы акциягъа  да  къатыша,  уллу болмагъан концерт  программаны  къурагъанды. «Ивушкачыла» да  бизге, абаданлагъа кеслерини жырда, тепсеуде, назму айтыуда усталыкъларын кёргюзтгендиле,-дегенди  Люаза Макоева.

Сабий садда концерт программа эки сагъатха жууукъ заманны баргъанды.  Анга абаданла, сабийле, садда ишлеген юйретиучюле да бирча тири къатышхандыла. Аны себепли эрикген адам болмагъанды.

                                       

Холаланы Марзият.
Поделиться: