Сёз байрамлагъа хазырланыуну, жаз башы сабан ишлени юслеринден баргъанды

КъМР-ни Башчысы Казбек Коков бардыргъан оператив кенгешде сёз келир байрамгъа хазырланыуну юсюнден баргъанды. Жыйылыугъа КъМР-ни  Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, КъМР-ни эл мюлк министри Хасан Сижажев,  Нальчик шахар округну администрациясыны башчысы Таймураз Ахохов къатышхандыла.

Казбек Коков май айны баш магъаналы ишлеринден бирине Ёлюмсюз полкну барыуун санагъанды. Ол Нальчикде 9 майда ётерикди.

 Андан сора жыйылыугъа къатышханла Къабарты-Малкъар Республиканы 100-жыллыгъына хазырланыу бла байламлы проектле къалай толтурула тургъанларына къарагъандыла «Ала бла байламлы ишле тири барадыла эмда дайымда контроль этиуню излейдиле. Сёз Нальчикде 7 сквер ишлене тургъаныны, социал объектлеге тынгылы ремонт этилгенини, жашиллендириуню, орамланы жарпытыуну эм аллай кёп башха жумушланы юслеринден барады», - деп чертгенди Казбек Коков.

Сюзюуню кезиуюнде тапландырыллыкъ тийрелени санына энтта къошууну онгларына да къаралгъанды.

Республикада урлукъ себиу къалай баргъанына кенгешде энчи эс бурулгъанды. Анда белгиленнгенича, жаз башы сабан ишле агротехника болжаллагъа эм мардалагъа кёре бардырыладыла. Ахыр шартлагъа кёре, жазлыкъла 76 минг гектарда салыннгандыла, ол а белгиленнген ёлчемни 35 процентин тутады. Урлукъла жетиширча бардыла.

-Минерал семиртгичле Россейни Эл мюлк министерствосу бла Промышленность эм сатыу-алыу министерствосу тохташдыргъан болжаллагъа кёре жибериледиле. Битеу да  62,7 минг тонна семиртгич жиберилгенди, ол а пландан 90 процентге асламды,- деп билдиргенди эл мюлкню министри.

Кенгешни ахырында респрубликаны оноучусу талай буйрукъ бергенди.