Саулукъ сакълау системада коронавирус бла байламлы болум сюзюлгенди

Къабарты-Малкъар Республиканы Башчысы Казбек Коков Россей Федерацияны тийресинде жангы коронавирус жукъгъан аурууну келиуюн эм жайылыуун алгъадан билип мадар этиу оператив штабны жыйылыууна къатышханды. Аны РФ-ни Правительствосуну Председателини орунбасары Татьяна Голикова бардыргъанды.

Тюбешиуде жангы коронавирус жукъгъан аурууну жайылыуу бла байламлы халла, саулукъ сакълау системада коронавирус бла байламлы болум сюзюлгендиле. Шёндюгюлю технологияла бла хайырланып дарманланы болгъанларына бла къалгъанларына къарауну къурау соруулагъа эс бурулгъанды. Авиасообщение ызланы жангыдан башлаугъа, тыш къыраллада эпидемиология болумну мониторингине эм чеклениулени кетериуге, ол санда регионлада, энчи къаралгъанды. Жыйылыуну эсеплерине кёре Казбек Коков кесини телеграм-каналында республикада эпидемиология халны юсюнден айтханды.

«Къабарты-Малкъарда болум тохташыулуду, коронавирус жукъгъан аурууну жайылыуу азайгъанды. Госпитальлада медицина болушлукъ 69 инсаннга тапдырылады, амбулатор багъыуда 308 саусуз барды. Ахыр суткагъа ковидден къыйналгъан 19 адам ачыкъланнганды. Аллай саусузланы багъыуда баш ауурлукъ амбулатор службагъа жетгени ючюн, дистанция халлы къарау арала, телемедецина консультацияла, байламлыкъ арала ишлейдиле.

КТ-аппаратлада тинтиулени андан ары бардырабыз, бусагъатда 4 къырал медицина организацияда 7 ауур медицина техника хайырланылады. Ол «ковидли» пневмонияны заманында билирге онг береди. Башха ауруула бла байламлы больницагъа жатардан алгъа борчлу халда тестирование этиледи: медицина организацияла регион бюджетни ырысхысына изленнгени тенгли бир экспресс-тестле бла жалчытылыныпдыла», – деп айтылынады билдириуде.

Дагъыда республиканы Башчысы аурууну заманында ачыкъларча 4 къырал эм 2 энчи иели медицина организациялада 7 компьютер томограф ишлегенлерин айтханды. КТ-тинтиуле сау сутканы ичинде этилинедиле. Пандемия башланнганлы бери 147 253 тинтиу бардырылгъанды, быйылны аллындан бери – 17 117.

«Амбулатор багъыуда болгъан коронавирусдан къыйналгъан саусузланы дарманла бла жалчытыуну андан ары бардырабыз. 2021 жылда ол борчлагъа деп федерал бюджетден республикалыгъа 66 миллион сомдан артыкъ жиберилгенди, республикалы бюджетден 30 миллион сом бёлгендиле. 45 мингден артыкъ саусуз алгъандыла дарманла. Быйыл федерал бюджетден регионнга 26 миллион сомдан артыкъ берилгенди, амбулатор халлы багъылгъан коронавирус саусузлагъа республикалы бюджетден 85 миллион сом бёлюннгенди. 40 мингден аслам амбулатор саусуз дарманла бла жалчытылгъандыла эм препаратланы къыстырыкълары этилгенди», – деп белгилегенди регионну таматасы кесини билдириуюнде.

Кёллендириу тёлеулени госпитальланы эки минг чакълы бир ишчиси алгъандыла. Анга деп республикалы бюджетден 470 миллион сомдан артыкъ жиберилгенди. Эсигизге салайыкъ, КъМР-ни Башчысы Казбек Коковну оноуу бла Къабарты-Малкъар  биринчилени санында эм къоркъуулу жукъгъан аурууланы госпитальларыны врачларына, орта эм кичи ызлада къауумладан ишчилерине федерал бюджетден тёлеулерине къошакъ тёлеулени да берип башлагъанды.
 
Республикада жамауатха вакцина салыу андан ары бардырылады. Аллай 85 жер кюн сайын низамда 8:00 сагъатдан 20:00 сагъатха дери ишлейдиле. Дарман салыу жаны бла 58 мобил къауум жумушларын тамамлайдыла, ала тийишли сууукъ тутхан эм термооборудование бла жалчытылыпдыла.

Поделиться: