Эллилени жашау болумларын игилендирирге аламат онг

Россельхозбанк быйыл 22 апрельден тебиреп элледе юй сатып алыргъа деп къуралгъан ипотекагъа къагъытланы жангыдан алып тебирегенди. Аны юсюнден финанс учрежденияны Къабарты-Малкъарда бёлюмюню пресс-службасы билдиргенди.

Льгота  халда  3 процентге берилген ёнкюч ахчагъа элде юй сатып алыргъа онг барды. Энди эл ипотека юйню жаланда жангыдан ишлерге бла хазыр журтну сатып алыргъа берилликди. 2020 жылны жаз башындан тебиреп Россельхозбанк ол жумушланы тамамларгъа 123, 1 миллиард сом къоратханды, аны хайырындан 63 минг россейли юйюр кеслерини жашау болумларын игилендиргендиле. Бу программа РФ-ни Эл мюлк министерствосу субсидияла бёлгенли жангыдан ишлеп тебирегенди.

Энди ёнкюч ахчаны бёлген болумла да тюрленнгендиле, юйню сатып алгъанда аны бахча салыргъа жери, не да юй ишлерге сюйгенни участкасы болургъа тийишлиди. Дагъыда бир жангычылыкъ, юйню энчи адамдан сатып алгъанда, аны ишлеп бошагъан кезиуюнден тебиреп, ол болжал 5 жылдан  кёп болмазгъа керекди. Ёнкюч алгъан адам юйню юридический лицодан сатып алса, аны ишленнген болжалы 3 жылдан озмазгъа керекди. Юйге табийгъат газ тартылынып болсун деген болум да кетерилгенди.  Жангы излем да барды, юйню сатып алгъан элде эсепге тюшюп жашаргъа керекди, бек аздан юч айгъа бир кюн.    

«Эл ипотека бизни къыралда жашагъанлагъа жашау болумларын игилендирирге иги болушлукъ этгенди. Кёп юйюрле экология жаны бла тап болумлары болгъан жерледе уллу юйлеге кёчгендиле. Аланы ичинде жаш юйюрле да кёпдюле, ол юйле бир къауумланы биринчи жашау журтларыдыла. Бек башы уа- ёнкючню аз процент бла берилиую уллу магъананы тутады. Биз бу программаны ишлеп тебирегенине къууаннганбыз, адамла аны бла хайырланырла деп, бек ышанабыз», - дегенди башда сагъынылгъан банкны халкъ асламламла бла ишлеу бёлюмюню таматасы Светлана Вишнякова.