Донецкден сабийлеге – Минги таугъа сейир жолоучулукъ

 Къабарты-Малкъарны Курортла эм туризм министерствосундан билдиргенлерине кёре, Донецк Халкъ Республиканы Макеевка шахарындан сабийле бусагъатда бизде «Радуга» социал-реабилитация арада солуйдула. Алагъа Минги таугъа жолоучулукъ къуралгъанды, аны кезиуюнде къонакъла Уллу Ата журт урушну эм уллу бийикледе фронтуну тарыхы бла да шагъырейленнгендиле.

«Кавказ.РФ» обществону келечилери, гид эм воспитательлери бла бирге сабийле канат жол бла 3500 метр бийикликге кётюрюлгендиле. «Мир» станцияда аланы экскурсиягъа элтгендиле, Приэльбрусьяны географиясыны эм тарыхыны юсюнден айтхандыла. Азау талада ала таулуланы миллет ашарыкълары бла сыйланнгандыла, обществону командасындан эсде къалырча саугъала алгъандыла. Ызы бла Нарзанла таласында «къайнай тургъан» сууладан да кёргендиле.

Андан ары жолоучулукълары Тырныауузгъа болгъанды, шахарны 5-чи номерли гимназиясыны окъуучулары алагъа жарыкъ тюбегендиле, Элбрус районну юсюнден хапарлагъандыла, ауузландыргъандыла. Курортла эм туризм министерствону башламчылыгъы бла уа сабийле дагъыда Отарланы Омарны атын жюрютген краеведение музейге да баргъандыла. Экскурсияны ахырында алагъа ведомстводан регионну тамашалыкъ жерлерини юсюнден буклетле юлешиннгендиле.

Жолоучулукъну «Кавказ.РФ» акционер общество Элбрус районну администрациясыны болушлугъу бла къурагъанды.

 

Кульчаланы Зульфия.
Поделиться: