Ёлген нёгерлерин эсгертгендиле, гюлле салгъандыла

26 апрель Радиация авариялада эм къыйын болумлада ёлгенлени эсгериуню халкъла аралы кюнюдю. 36 жыл мындан алгъа Чернобыльда атом-электростанцияда авария болгъанды, аны хатасын кетериу бла керти жигитле кюрешгендиле, ала миллионла бла саналгъан адамланы ёлюмден, дунияны уа экология катастрофадан сакълар ючюн, жанларын бергендиле.

Бу ишлеге Къабарты-Малкъардан 2500-ден аслам инсан къатышхандыла, кёзге кёрюнмеген душман жыл сайын кёплени ауушдургъанды. Профилактика жумушлагъа къарамай, радиацияны хатасы тийгенле арабыздан кетип барадыла. Аланы хурметлерине атап, уллу къыралыбызны жер-жерлеринде жыл сайын митингле къураладыла. Нальчикде да «чернобыльчыланы» эсгериу мемориалда жыйылыу болгъанды, анга МЧС-ни регионда Баш управлениясыны, шахарны администрациясыны, аскер комиссариатны келечилери, аварияда ишлегенле кеслери да къатышхандыла. Ветеранла Чернобыльда къалай кюрешгенлерини юсюнден айтхандыла, ёлген нёгерлерин эсгергендиле. Жыйылгъанла барысы да мемориалгъа гюлле салгъандыла, деп билдиредиле МЧС-ни бёлюмюню пресс-службасындан.

 Эсигизге салайыкъ, 1986 жылда Чернобыльда станцияда ароциркониевый реакция болуп, ара залгъа уллу ёлчемледе водород ычхыннганды. Ол бир бири ызындан эки кере чачдырылгъанды, асыры кючлюден, бетон плиталаны жан-жанларына атханды. Энергоблокну башы бузулуп, радоактив уран отлукъ жыйылгъан жер ачыкъ болгъанды. Радионуклидле уллу ёлчемледе, Хиросимада атылгъан атом бомбадан 400 кереге кёп болуп, хауагъа къошулгъандыла. Радиоактив изотопла жел ургъаны, булутла бла бютюн кенг жерлеге жайылгъандыла, аланы аламны къалайында да эсеплерге боллукъ эди.

 Аварияны хатасын кетерирге 1986-1987 жыллада Совет Союзну битеу регионларындан 240 минг адам – жер-жерли службаланы келечилери, аскерчиле, от ёчюлтюучюле, милициячыла бла доброволецле -  чакъырылгъандыла. Чернобыльни тёгереги бла 30 километрден адамла къутхарылгъандыла, артда да Украинадан, Белоруссиядан бла Россейден 200 мингден аслам инсан къоркъуусуз жерлеге кёчюрюлгендиле.