Мектеп да ишленирикди, суу ыз да тартыллыкъды

Арт заманлада  Нальчикни  жангы «Восточный» микрорайонунда жашау журтланы санына  танг къошула   барады. Ол себепден аны тийишли   инфраструктура бла жалчытыу  баш борчладан бириди. Анга кёре, жууукъ заманда «Билим бериу» миллет проектни чеклеринде 1500 окъуучугъа школ  ишлер план барды.   
Анда классладан тышында, спорт эм тюбешиуле бардыргъан залла, китапхана, ашхана, тигиучюлени, агъач усталаны бла слесарьланы мастерскойлары да боллукъдула. Арбызында   солурча,  физкультура бла спортдан жараула бардырырча эм тюрлю-тюрлю акцияла бла эришиуле ёдюрюрча майданла къураллыкъдыла.
Бюгюнлюкде  къурулушну башларгъа «ИМПЕРА-М» биригиу бла келишим этилгенди.  Объект 2023 жылны ахырына битерге керекди. 

Аны бла бирге, «Жашау журт эм шахар болум» миллет проектни чеклеринде 2022-2023 жыллада микрорайонда таза эм кир суу баргъан ызла да тартыллыкъдыла. Бюгюнлюкде тийишли ишлени тамамларыкъ  подряд организацияла айырылып,  келишим этилгенди. Планнга кёре, таза суу 30,88 эм кир суу 21,67 километр чакълы бирде тартыллыкъдыла.