Жангы техника къоллу болгъандыла

Къабарты-Малкъарда эл мюлк предприятияла бла организацияла эм башхала быйыл 31 трактор, бирер комбайн эмда чалыучу машина сатып алгъандыла. Ала барысы да жангыладыла, деп билдиргендиле республиканы Эл мюлк министерствосундан.

Тракторланы санында 25 «Беларусь» барды. Энтта да ючюсю «Петербургда трактор завод» акционер обществода чыгъарылгъандыла. Комбайн а «Брянсксельмаш» заводдан келгенди.

«Быллай техниканы жангыртыргъа ахшы амал барды, ол – лизингди. Аны хайырындан аграрчыла быйыл онтогъуз машина къоллу болгъандыла. Ол себепден сабан ишлерин да чырмаусуз, тынгылы этерге боллукъдула», - дегенди КъМР-ни эл мюлк министри Хасан Сижажев.

Жашил къудоруну урлугъун себиу барады

Республикада жаз башы сабан ишле андан ары барадыла. Ол санда тахта кёгетлени, жашил къудоруну урлугъун себиу да. Бюгюнлюкге аны ишин аграрийле 2,7 минг гектарда тамам этгендиле. Саулай айтханда уа, къудору беш мингден артыкъ гектарда ёсдюрюллюкдю. Ол кеси да былтырны ёлчеми тенгли болады.

Республиканы Эл мюлк министерствосунда айтханларына кёре, жашил къудоруну асламысын кесибизде консерва заводла жарашдырадыла. Былтыр ала быллай продукциядан 57,5 миллион условный банка чыгъаргъандыла. Шёндю уа келир кезиуню тирлигин жарашдырыргъа хазырланадыла, мюлк-техника онгларын жангыртадыла.