Къыйматлы бёлюмледен бири

КъМР-ни Эл мюлк министерствосундан билдиргенлерича, республиканы  промышленный  теплицаларыны  асламысында неда 60 процентинде  томатла ёседиле. Экинчи жерде уа  нашала барадыла.   Алай бла быйыл жыл башланнганлы теплица комплекследе 644 тонна чакълы тахта кёгет жыйылгъанды. Ол былтыр бу заманны эсеплерине келише кетеди.

Саулай алып айтханда, жыл сайын республиканы теплицаларында тюрлю-тюрлю тахта кёгетледен  9 мингден аслам  тонна тирлик алынады.  Былтыр а аны 9,3 минг тоннагъа жетдирирге онг табылгъанды.

Бюгюнлюкде регион  кесин толусунлай жалчытхандан сора да,   продукциясын  Шимал Кавказны регионларына, Юг федерал округну субъектлерине,  Москвагъа, Санкт-Петербургга эм башха шахарлагъа ашырады.  

Былтыр теплицаладан тышында, мюлкледе   тахта кёгетледен  315 минг тоннагъа жууукъ тирлик жыйылгъанды. Бахчаланы асламысында арендаторла томатла саладыла. Сёз ючюн, былтыр андан - 165,8, нашадан а 44,3 минг тонна жыйылгъанды. Алай бла эки къауумда да буруннгу жылдан 7,6 эм 4,2 процент ёсюм эсленеди.  Башха кёгетле бла кырдыкладан  да 29 минг тонна алыннганды. Район администрациялада айтханларына кёре, быйыл да  тахта кёгетлеге  15,4 минг гектарда жер бёлюннгенди.

Арт жыллада жашил къудоруну производствосу да  ёсе барады. Былтыр андан 24,3 минг тонна жыйылгъанды. Быйыл аны 5 минг гектарда салыр мурат этиледи, бюгюнлюкде  ол 2,7 минг гектарда чачылгъанды.  

Жашил къудоруну кёбюсюнде консерва заводла  саладыла эм продукцияны да кеслери жарашдырадыла. Былтыр андан саулай   57,5 миллион банка чакълы чыгъарылгъанды.