Нартларыбызны эсгере

Озгъан орта кюн Нальчикде Къабарты-Малкъар къырал университетде, Отарланы Керим атлы малкъар маданият арасында «Нарт дебетни туудукълары» деген фестиваль бардырылгъанды.

Аны ишине Нальчик шахарны, Элбрус, Чегем, Черек районланы школларындан окъуучула, устазла къатышхандыла. Ала нарт батырланы юслеринден назмула, жырла айтхандыла.

Устазла сабийлени фестивальгъа иги кёл салып хазырлагъанлары кёрюнюп тура эди. Юслери-башлары ариу, тизгинли. Ол да аллай жерде кёзге биринчи урунады.

Фестиваль ингирге дери баргъанды. Анга жюри къарагъанды. Аны санында Жангоразланы Мажит, Мусукаланы Сакинат, Жаболаны  Ализаде, Аттоланы Лейля, Ботталаны Мурат болгъандыла. Ала фестивальгъа къатышханланы ишлерин тинтгендиле, ахыр кёрюмдюлери уа жууукъ заманда чыгъарыкъдыла.

Бу фестиваль быйыл бла ючюнчю кере бардырылады. Аны къурагъанла Малкъар араны  ишчиси  Тюбейланы Светлана бла Тырныауузда музейни таматасы Этезланы Фатиматдыла.

                                                                                 

Бизни корр.
Поделиться: