Жаш адамла бютюн аслам эдиле

Озгъан байрым кюн  Нальчикде В.Вороков атлы Маданият фондха   кёп адам келгенди. Аланы араларында жашла бла къызла   аслам болгъанлары уа бютюнда къууандырады. Нек дегенде ол кюн анда  орус романсны ингири болгъанды. 

 Шахарда искусстволаны 1-чи номерли школунда юйреннгенле жырда усталыкъларын кёргюзтгендиле. Ингирни атына аны къурагъанла: Фондну председатели Люаза Макоева, 1-чи номерли музыкалы школда ишлеген преподавательле эмда школну  концерт-жарыкъландырыу иш жаны бла директорну орунбасары  Ася Котовская  «Иги макъам бла бирге бизге  сейирлик сезим келеди!» деп атагъандыла.

        Музыкалы байрамны  Ася Котовская ачханды эм бардыргъанды.

-Орус романсны жырлау тынч тюйюлдю, бютюнда жаш адамлагъа. Болсада  аны ол тюрлю  фахмусун ачыкълау, анга  кёп жанлы искусствогъа жол ачады. Романс, ол  жарыкъ мудахлыкъ бла толуду, ол макъамгъа салыннган, сюймеклик бла байламлы  назмуду. Аны бла тюбешиу не заманда да хычыуунду. Алай эсе уа, бюгюн  школда окъугъан  къызла бла жашла сизни, романсны сюйгенлени къууандырыр ючюн къолларындан келгенни аярыкъ тюйюлдюле.  Мен а романсны эмда музыкалы инструментледе согъулуп айтылгъан  макъамланы тарыхларыны юсюнден къысха билдириуле этерикме,-дегенди Ася Михайловна. Андан сора да, ол  романсны тарыхыны, ол къайсы ёмюрде, къайда жаратылгъаныны юсюнден да сейирлик хапар айтханды. Ингирге келгенле аны хапарларындан романсны юсюнден кёп сейирлик шартла билгендиле.

Андан сора уа Фондну уллу залында  Ф.Шубертни, Л.Рештабны серенадалары, А.Даргомыжскийни А.Пушкинни  сёзлерине жазылгъан «Юноша и дева», А.Гурилевну  А.Полежаевны сёзлерине «Сарафанчикни» М.Пуарени «Я ехала домой»,  П.Чайковскийни  «Осень», С.Рахманиновну  эмда А.Плещеевни  «Сон»,  Е.Бекетовну  «Сирень», дагъыда кёп башха белгили композиторланы бла поэтлени чыгъармаларына жыр эмда музыка эшитилгенди. Ингирде  бу жерли поэтле: Къулийланы Къайсынны, Алим Кешоковну, дагъыда башхаланы   назмулары да айтылгъандыла.

 Ингир сагъатха жууукъ заманны баргъанды. Залда олтургъанла  алагъа шум болуп тургъандыла. Хар жаш артистни  сахнагъа чыгъыууна эмда  номерин кёргюзтюп  бошагъаны  сайын  залда  толкъун къарсла къагъылгъандыла.

  Ахырында уа  аланы устазлары  Елена Кошелевагъа  бла  концертмейстер Людмила Нагоровагъа, сёзсюз, артистлеге да  ыспас этилип, гюлле, сертификатла, Фондну грамоталары да берилгендиле.

 Былайда Абдуллаланы  Борисни  жашы  Алимни юсюнден энчирек айтыргъа тийишли кёреме. Ол кеси да бу школну бошап чыкъгъанды. Бусагъатда анда преподавательлик этеди. Гитарада согъуу бла жаш гитчелигинден окъуна кюреше эди, болсада  Искусстволаны сабий школуна уа онтёрт жылында баргъанды. Аны бошагъандан сора музыкалы колледжге кирип, усталыгъын анда ёсдюргенди. Ол эки кере халкъла аралы конкурсланы лауреаты болгъанды. Школда ишлеую  бла уа кёп сабийлени гитараны сюерге, анда согъаргъа юйретеди. Аны сохталарындан бири –Лигидов Эльдар а  Шимал  Кавказ конкурсда  бардырылгъан «Чыгъармачы  бийикле»  биринчи жерге чыкъгъанды.

      Ингирде да Алим кёп сейирлик чыгъармаланы эшитдиргенди.

                                                 

Холаланы Марзият.
Поделиться: