Къырал органланы ишлерини юслеринден ётюрюкле жайгъанла жууапха тартыллыкъдыла

Социал пенсияла, Россейни къырал органларыны ишлерини юсюнден ётюрюк айтханлагъа жууаплылыкъ, инсанлагъа бла бизнесге санкцияланы кезиуюнде къырал болушлукъ. Апрельде дагъыда къаллай законла кючлерине киргенлерини юсюнден статьяда окъугъуз.

 Инсанлагъа бла бизнесге болушлукъ

 2021-2022 жыллада банкга  салыннган ахчагъа жыйылгъан процентлеге налог салынырыкъ тюйюлдю. Законну хазырлагъанланы оюмларына кёре, алай бла инсанла ахчаларын сакълаяллыкъдыла, аны бла бирге уа банкланы ишлерин жалчытыргъа онг боллукъду.

 Инсанланы эм организацияланы мюлклерине эм жерге кадастр багъала 2022 жылда 1 январьда болгъан ёлчемде сакъланадыла.

«Байлыкъгъа налог» быйыл 1 январьдан сора сатып алыннган машинала ючюн тёленирикди – ол 10 миллион сомдан багъа болса. Эсигизге салайыкъ, алгъын тёлеулени 3 миллиондан багъа тургъан машиналагъа салыргъа хазырланнгандыла. 

Информация - технологияла бла кюрешген компаниялагъа 2022-2024 жыллада  файдаларына налог 0 процент боллукъду.

 Тыш къыраллы дарманланы россейли рынокда сатаргъа эркинлик бериуню низамы женгиллетиледи.

Энчи операция

Украинада миллетчилеге къажау энчи операциягъа къатышхан аскерчилеге къаугъаны ветераны эм сакъаты деген ат берилликди. Ол нек магъаналыды дегенле, алагъа налог, транспорт, жер, жашау журт жаны бла социал болушлукъ берилликди, коммунал тёлеулеге льготала тохташдырыллыкъдыла.

Социал пенсияла

1 апрельден социал пенсияла 8,6 процентге ёсдюрюлгендиле. Бу ахча 4 миллион адамгъа тёленеди. Сёз сакъатлагъа,  ёксюз сабийлеге, башха къауумлагъа тёленеди. Пенсияны кёбейтир ючюн докуметле хазырлар кереклиси жокъду.

Низам женгиллетилгенди

Социал себепликни юлешиуню женгиллетир мурат бла аны алгъанланы банк карталарыны тарихлерин информация системагъа сингдириуню низамы алышынырыкъды. Аны ючюн «Госуслуги» порталда тийишли бёлюмню толтуруп, шартланы хайырланыргъа эркинлик берирге керекди. 

Дагъыда бир жангычылыкъ. 14 жылдан тамата жаш адамла «Госуслуги» порталда эсепге турургъа боллукъдула. Ала СНИЛС-ни, паспортну тарихлерин, телефон номерлерин, электрон почталарын белгили этерге керекдиле.  Алай эсепге аланы атасы, анасы, башха законлу келечиси салыргъа эркиндиле. Бу жангычылыкъны магъанасы недеди дегенде, алай бла электрон дневникни ачаргъа, юйге берилген дерслени билирге, билим бериу учреждениялагъа окъуугъа кириуню жорукълары бла шагъырейленирге онг боллукъду.

Ётюрюкню жайыу

Тыш къыраллада россейли къырал органланы ишлерини юслеринден ётюрюк хапарла жайгъанла жууапха тартыллыкъдыла. Бу низам кючюне 5 апрельде киргенди. Былайда сёз посольстволаны, прокуратураны, Росгвардияны, МЧС-ни эмда Следствие комитетни юслеринден барады. Аланы тыш къыраллада Россей Федерацияны, аны инсанларыны сейирлерин къоруулау, халкъла аралы къоркъуусузлукъну сакълау жаны бла  борчларын толтургъанларыны юслеринден ётюрюк хапарланы жайгъанны эркинлиги 3 жылгъа сыйырылыргъа боллукъду. Дагъыда къырал органланы ишлерини даражасын тюшюргенлеге тазир салынырыкъды. 

Сабийлеге тёлеуле

Россейни Президенти 1 апрельден башлап 8 жылдан 17 жылгъа дери сабийле ёсген юйюрлеге ай сайын тёлеуле этиуню юсюнден Указгъа къол салгъанды. Ахча социал болушлукъ алыргъа тийишли юйюрлеге берилликди. Ол юйюрлени къолайлыкъларын игилендирир мурат бла юлешинеди. Документде белгиленнгенича, ахча юйюр алгъан файда аны хар келечисине юлешгенде субъектде жашау этерге жетерик ахчаны эм аз ёлчемине жетмеген кезиуде тёленеди.