Жаш адамла ууну заранлыгъыны юсюнден билим алгъандыла

«Ёлюм къайда сатылгъанын билдир!» битеуроссей акцияны биринчи бёлюмюню эсеплери чыгъарылгъандыла, деп билдиргендиле бизге КъМР-де Ич ишле министерстводан.

Аны чеклеринде Жарыкъландырыу, илму эм жаш тёлюню ишлери жаны бла министерство 14-25 мартда республиканы битеулю билим берген учрежденияларында 487 жыйылыу бардыргъанды. Ала наркотиклени законсуз сатыу-алыуну, ууну хайырланыуну заранлыгъын ангылатыугъа жораланнгандыла. Ол санда класс дерсле, спорт эришиуле, ушакъла, «тёгерек столла» къуралгъандыла. Битеу да бирге алагъа 12,4 мингден аслам окъуучу бла студент къатышхандыла.

Тюбешиулеге КъМР-де МВД-ны Наркотиклеге къажау управлениясыны келечилери, акъылбалыкъ болмагъанланы ишлери жаны бла инспекторла, полицияны участка уполномоченныйлери, школланы башчыларыны юйретиу жаны бла орунбасарлары, социал ишчиле да тири къатышхандыла.

 Акцияны чеклеринде наркотиклени законсуз сатыу-алыу бла байламлы аманлыкъла ючюн жууапха  тартылып чыкъгъанланы юйюрлеринде энчи тюбешиуле къуралгъандыла. Алада ёсген сабийле бла ангылатыу ушакъла бардырылгъандыла.

 Акъылбалыкъ болмагъанла бла жаш адамла бирге жыйылгъан 379 жер, жашау журтла, транспорт, солуу эм сатыу-алыу арала тинтилгендиле, алада наркотиклени бла психотроп затланы, аракъыны, тютюнню жаш адамлагъа сатыу бла байламлы шартла тинтилгендиле.

Наркотиклени законсуз сатхан 6 интернет сайт ачыкъланнганды. Аланы юслеринден Роскомнадзорну КъМР-де бёлюмюне белгили этилгенди эмда аланы ишлерине чек салыу жаны бла оноула чыгъарылгъандыла.

Ич ишле министерствогъа, башха жууаплы органлагъа республиканы инсанларындан наркотиклени законсуз сатылгъаныны юсюнден 52 билдириу келгенди, алагъа кёре 62 уголовный иш ачылгъанды, административ бузукълукъланы юсюнден 30 бегим чыгъарылгъанды. Полициячыла 1 килограмм 800 грамм уулу затла сыйыргъандыла.