Къуллугъуна келишмеген оноу чыгъаргъанды

Чегем шахарны жер-жерли администрациясыны алгъыннгы таматасына кесини къуллугъуну эркинликлерине келишмеген жумушланы толтургъаны ючюн уголовный иш ачылгъанды.

 РФ-ни СК-сыны Чегем районда Следствие управлениясы Чегем шахарны алгъыннгы оноучусуна РФ-ни УК-сыны 286-чы статьясыны 1-чи кесегине бузукълукъ этгени ючюн терслеу материалла ачхандыла. Къуллукъчу кесини эркинликлерине келишмеген ишлени толтургъаны ючюн терсленеди.

 Следствие тохташдыргъаныча, 2021 жылда сентябрьде терсленнген энчи адамны сейирлерин къоруулар мурат этгенди. Оноучу энчи иелиге кенглиги 36405 квадрат метрге жетген жерни бла анда орналгъан мекямны (кенглиги 26 квадрат метр)  берирге кереклисини тюзлюгюн бегейтгенди. Ол жер белгиленнген жумушлагъа хайырланмагъанын биле тургъанлай, аны сатыуну, иесине бериуню юсюнден документни, сатыу-алыу келишимни къабыл кёрюп, шахарны администрациясыны мухурун  салгъанды. Алай бла бу жер шахарны иелигинден чыгъарылып, энчи иелиге 90 минг сомгъа сатылгъанды.

Уголовный иш андан ары тинтиледи.