Цифровизация – тамблагъа атлам

Кёнделен элни Доттуланы Ахматны  атын жюрютген биринчи номерли мектебинде, Элбрус районну башха школларындача, «Билим бериу» миллет проектни чегинде «Цифровая образовательная среда» федерал проект толтурулады. Аны юсюнден ушакъны директорну юйретиу жаны бла орунбасары Атмурзаланы Мадина бла бардыргъанбыз.

         - Мадина Махтиевна, проектни борчу недеди, сора ол сизни мектепде къалай тамамланады?

 - Проектни мураты билим бериуню бийик даражада жалчытырча шёндюгюлю, къоркъуусуз цифра болумну къурауду. Аны бла байламлы бизде цифра эм гуманитар профильли «Точка роста» ара ачылгъанды, ол сабийлени бу жаны бла билимлерин, окъутуу-юйретиу ишни хайырлылыгъын ёсдюрюрге себеплик этеди. «Точка ростада» къошакъ программала бла юйреннгенлени саны ёсе барады, бусагъатда ала 300-ден аслам боладыла. Сабийле дерследен сора естественнонаучный, техника, гуманитар профильледе юйренедиле, ол санда дистанционный амалла бла да, аны ючюн ара жангыртылгъан мюлк-техника керекле бла да жалчытылыннганды.

- Цифра амалла къалай кийириледиле?

- Мен оюм этгенден, ала юйретиу-окъутуу ишге толусунлай сингдирилгендиле. Араны устазлары Владикавказда «Сабий технопарк «Кванториумда» «Гибкие компетенции проектной деятельности» деген курсну ётгендиле. Юйретиу «Сейирлик микродуния», «3D моделирование», «Къоркъуусузлукъну школу эм биринчи болушлукъ этиуню амаллары», «Студия Медиа-ара», «Пилотсуз учуу аппаратла», «Программированияда биринчи атламла», «Шахматла» деген программалагъа кёре бардырылады. Аны ючюн арада бусагъатдагъы излемлеге келишген компьютерле, фотоаппарат, виртуал шлем, кёп жумушланы тамамлагъан интерактив комплекс, конструкторла, шахматла ойнарча комплектле бардыла.

- Арада юйретиуню эсеплерини юсюнден айтсагъыз эди.

- Сабийлеге бу программала сейирдиле, аланы жетишимлери да бардыла. Сёз ючюн, башланнган классланы окъуучулары информатикадан устаз Макытланы Жулдузхан Борисовнаны башчылыгъында Информатиканы кюнюне аталгъан «Час кода» деген эришиуде ахшы кёрюмдюлери ючюн грамотала бла саугъаланнгандыла.  

Быллымны орта школунда шахмат турнирни муниципал кезиуюнде командабыз экинчи жерни алгъанды, кубок, грамотала эм майдалла бла къайтханды. Сабийле «Цифраны дерси» битеуроссей акцияда бу жаны бла жангы усталыкъла бла шагъырейленнгендиле, сертификатла къоллу болгъандыла. Онлайн халда къуралгъан «Кёп ёмюрлюк Югра» краеведение олимпиадада он эм кючлю окъуучуну къауумуна Энейланы Салима киргенди, ол диплом эм юйретиуде керекли гаджет бла саугъаланнганды. Бу олимпиадагъа къыралны 85 регионундан 500 мингден аслам школчу къатышхан эдиле. 

- Белгилисича, шёндюгюлю юйретиу система адамгъа харкюнлюк жашауунда жараулу сынамны берирге тийишлиди.

- Бу борчну тамамлай, сабийлени халатсыз жазаргъа, текстлени тинтирге, математикагъа, тюрлю-тюрлю информация бла ишлерге, алгъан билимлерин хайырлана, прикладной заданияланы толтурургъа юйретебиз. «Цифраны» уа ол жаны бла онглары уллудула. Къарап кёрюрге боллугъу, интерактив инструментле, бир жанындан, жашауда болумланы кертисича суратлай, сабийни билимин къалай жаратыргъа кереклисине тюшюндюредиле, бирси жанындан а, къыйын предметле аралы концепцияланы тынчыракъ къурашдырыргъа юйретедиле. Андан тышында, цифра билимликлерин ёсдюреди, интерфейсле бла ишлерге сынамларын ёсдюрюрге себеплик этедиле.

- Ушагъыбызны эсебин чыгъара, цифра билим бериуге кёчюу Интернет-технологияланы къурауда уллу ишди деп айтыргъа боллукъду.

- Ол, кертиси бла да, алайды. Бюгюнлюкде илму терк айныйды, кюн сайын жангы структурала чыгъарыладыла. Билим бериуню цифровизациялау окъуучулагъа информация дунияда излегенлерин терк табаргъа болушурукъду.