Илму бла кюреширге кёллендирирча - арала

Чегем райондан  «Точка роста» программагъа биринчи Тёбен Чегемни школу къатышханды. «Билим бериу» миллет проектни жашауда толтурууну чегинде 2019 жылда мектепде цифра эм гуманитар жаны бла ара ачылгъанды. Бу иш тынгылы тамамланырча, кабинетлени хазырлау, кадрланы юйретиу, учрежденияны информация хазнасын игилендириу жаны бла жумушла толтурулгъандыла. Арада къошакъ билим бериу 8 жаны бла бардырылады: «Промдизайн», «Шахматла», «Дуния объективде», «Ата журтну къорууларгъа хазырма», «Компьютер моделированияны студиясы» эм башхала. Арала ноутбукла, квадрокоптерле, шахмат столла эм  башха керекле бла жалчытылыннгандыла, деп билдиреди мектепни директору Сарбашланы Мустафаны жаны Альберт.

«Точка роста» программаны хайырындан окъуучулагъа илмуланы теренинден билирге, жангы технологияла бла хайырланыргъа, бек башы уа - командада ишлерге юйренирге онг берилгенди. Сабийлеге анда дерсле бек сейирдиле, ала ары сюйюп жюрюйдюле.

Окъуучуланы чыгъармачылыкълары айнытыуну сыйлы борчха санап

Сабийлени фахмуларын айнытыу хар мектепни да борчуду. Тёбен Чегемни школунда да бу жаны бла уллу иш тамамланады. Бек аламаты, анда театр кружок къуралгъаныды, анда сабийле бла Жабелланы Зубайда ишлейди. Аны башчылыгъында окъуучула сахнада ойнауну энчиликлерине тюшюнедиле, байрамлагъа сейир сценкала хазырлайдыла, аланы кёргюзте, устазларыны, ата-аналаны  да кёллерин жарытадыла.

Арт жыллада музыкадан, сурат ишлеуден дерслени къошакъ билим бериуге ётдюрюуню юсюнден кёп айтылады, бютюнда бюгюнлюкде юйретиу программа къыйын болгъанын, сабийлеге окъууларында кёп жангы зат къошулгъанын, юйге аслам иш берилгенин эсге алсакъ. Алай хунери болгъан балагъа мында ол жаны бла да айныргъа онг бериледи.

«Ана тилим, мени жаным, мени дуниям» деген республикалы фестиваль эски адетлени сакълауда, миллет энчилигибизни ёсе келген тёлюлеге кёргюзтюуде уллу жумушну тамамлайды. Тёбен Чегемни школчулары кеслери жарашдыргъан затладан кёрмюч къурагъандыла.  Тукъум тамгъаланы ишлегендиле, эрттегили кийимлени, жумуш этгенде кереклени юслеринден хапарлагъанларын, таулу аш - азыкъланы хазырлагъанларын жюри бек жаратхан эди эм Гран-прини алагъа бергенди.

Билим бериу учрежденияла бла байламлыкъла жюрютюу –

шуёхлукъну мурдору

Мектеп къоншу элледен школла, башха учрежданияла бла да байламлыкъла тохташдыргъанды. Алгъаракълада «Кюн шахар» бла келишим тауусулгъанды. Анда окъутханла «Кванториум» мобильный технопарклары бла Тёбен Чегемни мектебине былтыр ноябрьда келгендиле, эки ыйыкъны ичинде ала, кеслерини оборудованияларын хайырлана, мында сабийлеге дерсле бергендиле. Аллай дерсле февральдада бардырылгъандыла энди уа  майда боллукъдула. Ала сабийле бла ишлеуню, мында болумну, табийгъатны да жаратхандыла. Бу дерслеге Хушто-Сыртны школундан окъуучула да къатышханларын белгилерге тийишлиди, быллай байламлыкъла сабийлени араларында шуёхлукъну да кючлейдиле. 

Малкъар къырал драма театр да къонакъда дайым болуучуду. «Пушкинская карта» амалны хайырындан ала школгъа келип спектакльле кёргюзтедиле, окъуучула да аланы ашыгъып сакълайдыла.

Сабийле таматагъа, устазгъа, ата-аналагъа намыс эте биледиле. Жууап къайтаргъан, абадан бла уллу сёлешген, отоугъа адам кирсе,  ёрге къопмагъан дегенча осал къылыкъла эсленмейдиле. Кесигизни, элигизини, халкъыгъызны атын иги бла айтдырыгъыз, адамлыгъыгъыз болсун, кесигизни ариу жюрюте билигиз деп юйретебиз, деп чертеди Альберт Мустафаевич.

 

Кульчаланы Зульфия.
Поделиться: