Ачыкъ эм терен магъаналы ушакъла

КъМР-ни саулукъ сакълау министри Рустам Калибатов Огъары Малкъарны школчулары бла тюбешгенди. Сагъынылгъан элни 2-чи номерли орта школунда сейир ушакъ къуралгъанды. Тюбешиуню чегинде жаш адамла дунияда коронавирус бла байламлы шёндюгю болумну, аны болдурмазча этиу амалланы, вирусну къуруругъуну бла къаллыгъыны юсюнден соргъандыла.

Рустам Калибатов ёсюп келген тёлю сабийликден окъуна кесини эм тёгерекдегилени саулукъларына сакъ кёзден къараргъа тийишлисин белгилегенди. Хал бютюн бусагъатда жарсыулу болургъа боллукъду, жашау тюрлене баргъан вирусла бла толгъанда. Ол коллективли иммунитетни юсюнден да айтханды, анга себепликни уа жаланда вакцинация этерикди.

Жаш адамла Рустам Михайловични сейирлерини, аны усталыкъ жаны бла ёсюуюню юсюнден соргъандыла. Министр медфакда окъугъан жылларында больницада санитар болуп тургъан кесини ишини ал кезиулерини юсюнден хапарлагъанды. Ол белгилегенича, инсанны жетишими аны ишлерге тартылгъанына кёре болады.

- Адам кесини аллында борчла салыргъа керекди, аланы тамамларча жол бла барыргъа да. Даулашла къозгъамай, тёгерегиндегиле бла байламлыкъла къурай билген да бек магъаналыды, - дегенди тюбешиуню сыйлы къонагъы.

Рустам Калибатов Черек районну юсюнден кёп ариу сёз айтханды, ол кеси да мында аслам заманны ишлеп, адамладан ыразылыкъ тапханды. Аны урунуу жолуну юлгюсю, жаш тёлюню итиниулюгюн къозгъарча ахшы шарт болгъаны да ишексизди. Тюбешиуге къатышханланы оюмларна кёре, ушакъ керти да ачыкъ халлы эм терен магъаналы болгъанды.