Сабийле артда жашауда жарарыкъ усталыкъны сайларларына къарайбыз

Устазны иши къыйын  болгъанлыкъгъа, эсде къалырча кёп хычыуун такъыйкъалагъа уа байды. Сабийле, сени кёргенлей, аллынга чабып къучакълагъанлары, санга ышанып, ийнанып къарагъанлары къаллай уллу насыпды. Аллай кезиуледе адам, бу усталыкъны сайлай, кеси заманында тюз оноу этгенин ангылайды.

 Жаболаны Аминат Магомедовна Тёбен Чегемни мектебинде технологиядан дерслени береди, «Точка роста» арада да юйретеди, аны  устазлыкъ стажы 33 жыл болады. «Мени дерслериме асламысында къызчыкъла жюрюйдюле. Ала, тюрлю-тюрлю эришиулеге къатыша, муниципал, республика даражада да алчы жерлеге чыгъа тургъандыла. «Модная весна» деген конкурсда биринчи, экинчи жерлеге чыкъгъандыла», - дейди ол.

«Точка ростада» Аминат Магомедовна 50 сабийни «Промышленный дизайн» жаны бла юйретеди, ол да технологиядан къошакъ билим бериуча барады. Бу аралада дерсле сабийлени хунерлерин ачыкъларгъа эм айнытыргъа болушадыла.

Устаз белгилегенича, бюгюнлюкде жаш адамла артда жашауларында жарарыкъ, иш хагъы игирек болгъан усталыкъланы сайларгъа сюедиле. Аны ючюн кёплеге бийик билим алгъанларындан сора окъуна, квалификацияларын тюрлендирирге неда жангыртыргъа тюшеди. Биз юйретиуню ол шартланы эсге алып къурайбыз, ала ишчи усталыкълагъа эс бурурларына къарайбыз. Аш этиучюле боладыла, дизайн колледжге киредиле, дейди ол.  

 «Точка роста» кабинетледе ачыкъ дерсле, жыл сайын илмуланы ыйыкълары, тюрлю-тюрлю мероприятияла да бардырыладыла.