Низамлыла - КВН-де

КъМР-де УФСИН-ни  тиширыула тургъан  4-чю номерли  тюзетиучю колониясында  КВН конкурс бардырылгъанды. Анга колонияда низамгъа, жорукълагъа  бузукълукъ этмей, кеслерин тап жюрютгенле къатышыргъа эркинлик алгъандыла.

Бу ишни магъанасы – анда тургъан тиширыуланы  культура жаны бла байыкъландырыу, ишден бош заманларын хайырлы ётдюрюрча этиу, ниет- къылыкъ жаны бла  юйретиуге бурулупду.

Конкурс тёрт жаны бла бардырылгъанды. Ала  кесинги таныт;  кюлкюлю бир затны кёргюзт эмда  STAND  UP, бир белгили адамны эриклеу.  Конкурсха хар отряддан юч  команда къатышханды.

Аны бардырыргъа  хар бири да тынгылы эмда уллу жууаплылыкъны ангылап хазырланнгандыла. Сёзсюз, тиширыула сахнагъа чыгъып, артистлеча, хар номерлерин  эс бурурча кёргюзтгендиле.

  Жюрини къауумуна да бу жол алагъа багъа бериу тынч тюйюл эди. Нек дегенде конкурсха къатышханланы  бары да  фахмуларын кёргюзтюр ючюн къалмагъандыла. Костюмланы  кеси къоллары бла тикгендиле, кеслери жазгъан  назмуланы  да  аламат окъугъандыла.  КВН баргъан кезиуде  алагъа къарагъан  колонияда олтургъан тиширыула да къолларындан келгенича кеслерини отряддан  конкурсантлагъа  къарслары, кёллендирген сёзлери  бла болушур ючюн къалмагъандыла. Ахырында уа  командалагъа  1, 2, 3-чю даражалы дипломла берилгендиле.

 Конкурс  битеу санитар жорукъланы эсге алыу бла бардырылгъанды, деп билдиргендиле КъМР-де УФСИН-ни пресс-службасындан.