Аскерде къуллукъ этиуден къачаргъа кюрешгендиле

Урван районну прокуратурасы аскерде къуллукъ этиуден къачхан инсанлагъа ачылгъан уголовный ишлени сюдню къараууна бергенди.

  «Аскерчи борчланы эм аскерде къуллукъ этиуню юсюнден» федерал законнга тийишлиликде, аскер комиссариат инсаннга чакъырыу бегимни ашырып, алай ол белгиленнген кюнде, заманда бир тюрлю сылтаусуз ары келмесе, жууапха тартылады.

 Районну прокуратурасы бу закон къалай толтурулгъанын тинтген кезиуде былтыр декабрьде Урван районну аскер эсепде тургъан юч инсаны бир тюрлю сылтаулары болмай, аскерге чакъырыудан къутулургъа умут этгенлери тохташдырылгъанды.  

 Аны бла байламлы надзор ведомство терслеу материалланы Россейни Следствие комитетини Урванда районла аралы бёлюмюне бергенди. Ала тинтилип, жаш адамлагъа РФ-ни УК-сыны 328-чи статьясыны 1-чи кесегине кёре уголовный ишле ачылгъандыла (аскерде къуллукъ этиуден къачыу). Ала сюдню къараууна берилгендиле.

Быллай аманлыкъ этгенни эркинлиги эки жылгъа дери сыйырылыргъа боллугъун айтырчады.