Электрокюч ючюн тёлеулени толусунлай жыяргъа

«Россети Шимал Кавказ» компанияны Къабарты-Малкъарда бёлюмю – «Каббалкэнерго» бардыргъан ангылатыу ишни хайырындан быйыл январьда эл мюлк товарла чыгъарыучуладан ахча жыйыу игирек болгъанды. Сёз мында хайырланылгъан электрокючню багъасыны юсюнден барады, дегендиле компанияны пресс-службасында.

Алай бла ол айда аграрийле кюйдюрген токну багъасыны 94 процентин бергендиле. Озгъан жылны ол кезиу бла тенглешдиргенде, кёрюмдю беш процентге кётюрюлгенди. Районланы юсюнден айтханда, ал юч жерге: Урван (108 %), Зольск (97 %) эм Элбрус (94 %) районла чыкъгъандыла.

Бизни республикада электрокючню аслам хайырланыучу бёлюмледен бирине эл мюлк саналады. Сёзсюз, анда тёлеу низамгъа бек уллу эс бурулады. Энергетикле бу сферада уруннганла бла мындан арысында да къыйматлы ишлерге таукелдиле. Аны бла бирге тёлеулени жыйыуну да жюз процентге жетдирирге умутлудула.