Инсанланы сейирлерин къоруулай

Субъектлени къырал эм жер-жерли власть органлары оюлургъа къоркъуулу юйлени тизмесине кийирилген объектлени юслеринден Росреестрге белгили этерге керекдиле. Бу жаны бла федерал закон быйыл 1 февральда кючюне киргенди.

 Алай бла жууаплы власть органла юй оюлургъа къоркъуулу, андан адамланы кёчюрюрге тийишли, неда тынгылы жангыртылыргъа кереклисини юсюнден шартланы Росреестрге белгили этерге борчлудула. Ызы бла ала ЕГРН-нге кийирилликдиле. Алай бла уа инсан фатарны сатып алгъанда юйню юсюнден толу шартланы алаллыкъды.

Законну Россейни Къырал Думасы былтыр 12 майда къабыл кёргенди. Закон бир жанындан фатарны сатыу-алыу бла байламлы низамны женгиллетеди, башха жанындан а инсанланы эркинликлерин къоруулайды. Фатарны сатып алгъан адам юйню болумуну юсюнден жаланда тышындан къарап оюм этгенди. Алай тышы ариу сюртюлген мекямны коммуникациялары, ич болуму ууалыр чекге жетерге боллукъду, кёзге уа ол урунмайды. Инсан фатарны алгъандан сора   юй оюла тургъанына, андан адамланы кёчюрюрге кереклисине тюшюнсе, кечирек болады.

 Жашау журтну болумуну юсюнден шартланы муниципал власть органлагъа эсгертиу берип алыргъа да жарай эди, алай аладан жууапны кёп сакъларгъа тюшгенди.   Энди уа жангы закон къыралны инсанларыны эркинликлерин бла излемлерин сакъларыкъды, мекямны юсюнден толу хапарлы болургъа онг берликди.

 

Тикаланы Фатима хазырлагъанды
Поделиться: