Жаныуарлагъа белги салыу закон быйыл сентябрьде кюч аллыкъды

Бу законну проектин Россейни Правительствосу Къырал Думагъа былтыр ноябрьде жибергенди. Аны РФ-ни Эл мюлк министерствосу жарашдыргъанды. Шёндю анда жаланда эл мюлк маллагъа белгиле салыуну юсюнден айтылады. Алай министерство уа ары юй хайыуанланы да къошаргъа умутлуду, дегендиле Россельхознадзорну Шимал Кавказда регионла аралы управлениясында.

Закон къабыл этилсе, жаныуарланы эсеплеу эмда белгилеу жаны бла ветеринар жорукъла жарашдырыллыкъдыла. Анда алагъа идентификация номер къалай бериллиги, белги къаллай боллугъу эмда ол не затны юсюнден билдирлиги тохташдырыллыкъды. Дагъыда ол тизмеге малланы эмда жаныуарланы къайсы тюрлюлери тюшериклерин да туура этерикдиле.

Законну проектинде айтылгъаныча, малланы иелери белгини кеслери сатып аллыкъдыла, аланы эсеплеу ючюн а хакъ тёлерик тюйюлдюле. Белгилени юсюнден айтханда, пластмассдан этилген тюрлюсю шёндюледе жыйырма сом чакълы турады, терини тюбюне кийирирге жараулу микрочипни багъасы уа 150 сомгъа жетеди.

Белгилери болгъан малланы бла жаныуарланы юслеринден битеу информация ветеринария жаны бла къырал информация системада («ВетИС») сакъланырыкъды. Аны Россельхознадзор бардырады. Эсеплеу ишни уа «Хорриот» системада тамамларыкъдыла. Ведомство аны былтыр 18 октябрьде хайырланып башлагъанды.