Къыйынына – бийик багъа

Кёп болмай  Тырныауузну 5-чи номерли гимназиясыны орус тилден бла адабиятдан  устазы Жеттеланы Лейля Россейни Президентини Сыйлы грамотасы бла саугъаланнганды. Ол махтаугъа уа коронавирус жукъгъан ауруу кенг жайылыргъа къоркъуу уллу болгъан кезиуде билим бериу учрежденияны ишин тыйгъычсыз  бардырыргъа  тийишли болгъанды.

 Устаз окъуучула бла  бир тил таба билгенден сора да, ала дерсге эс  бурур, аны ангылар ючюн  амалланы  да хайырланады.  Аны ишинде жетишимли болгъаны да анданды.  Лейля Хасановна  къыйын эпидемиология кезиуде, школчулагъа узакъдан окъургъа тюшгенде да, уллу кёллюлюк этмей,  борчун тынгылы толтурургъа кюрешгенди. 

 Кеси да   билимин  тохтаусуз ёсдюрюрге итинеди. Ол санда педагогланы битеуросей  видеоконференцияларына,  вебинарларына эм усталыкъны ёсдюрген курслагъа да тири  къатышады. Орус тилден бла адабиятдан  ишлерин басмалагъанлай турады. 

 Ишчи нёгерлери айтханнга кёре, Лейля Хасановна толусунлай  ишине берилген, уллу, гитче бла да  келише билген, ачыкъ жюрекли, огъурлу адамды.  Кёп жылланы бет жарыкълы уруна келгени ючюн тюрлю-тюрлю саугъалагъа тийишли болгъанды.  Ол санда «Россей Федерацияны Билим бериуюню  сыйлы ишчиси» деген  белги, КъМР-ни Жарыкъландырыу, илму эмда жаш тёлюню ишлери жаны бла министерствосуну, Элбрус районну администрациясыны сыйлы грамоталары бла   да саугъаланнганды.