Кадастр палатагъа къагъытланы алыу-бериуде жангычылыкъла

Федерал Кадастр палатаны башчысы Владислав Ждановну оноуу бла энди жеринден тепдирилмеген мюлкню Бирикген къырал реестринден (ЕГРН) информация бла байламлы документлени курьер жиберип алыу эм бериу жумушну багъасы иги да азайгъанды. Ведомствону Къабарты-Малкъарда бёлюмюнде айтханларына кёре, республикада жашагъанла юйлеринден чыгъа турмай жиберирге сюе эселе къагъытларын, аны ючюн курьерге 700 сом тёлерикдиле. Аллай мюлкню юсюнден выписка алыуну багъасы уа 400 сом болгъанды. Эсге сала айтсакъ, ары дери ала ючюн 1530 эм 1020 сом тёлерге тюшерик эди.

Бу жумушланы багъалары предприятиялагъа бла организациялагъа да азайтылгъандыла. Ол энди 2550 бла 1530 сомну орунуна 1000 эм 500 сом болгъанды алагъа.

Кадастр эсепге салыу эмда иеликге эркинликни къырал регистрациясын этиу жумушланы (жерине барып документлени алыу) багъалары уа тюрленмегенди. Уллу Ата журт урушну ветеранларына, сакъатланы 1-2 къауумларына киргенлеге (мюлк аланы иеликлеринде эсе) жумушланы бары да хакъсыз бериледиле.

Бу иш бла байламлы соруулары болгъанла 8(8662) 93-00-17 номер бла сёлешсинле неда filial@07.kadastr.ru электрон почтагъа жазсынла.