Медиклеге жукъгъан ауруугъа къажау къарыуларын-кючлерин аямай кюрешгенлери ючюн жюрек ыразылыгъын билдиргенди

    Казбек Коков республиканы медицина учрежденияларыны баш врачлары бла ишчи тюбешиу бардыргъанды. Ала республикада  шёндюгю эпидемиология болумну сюзгендиле. КъМР-ни Башчысы республикада, хар жердеча, ОРВИ-ден бла жангы коронавирус инфекциядан ауругъанланы саны ёсгенин эсгертгенди. Алай а медиклени усталыкъларыны эмда сынауларыны хайырындан регион «жангы толкъундан» да бет жарыкълы къутуллугъуна ийнаннганын айтып, алагъа  бу жукъгъан ауруугъа къажау къарыуларын-кючлерин аямай кюрешгенлери ючюн жюрек ыразылыгъын билдиргенди.

 Тюбешиуню кезиуюнде РФ-ни Саулукъ сакълау министерствосуну СКФО-да  штатда болмагъан баш инфекционисти КъМР-ни Саулукъ сакълау министерствосуну СПИД-ден сакъланыу эмда анга къажау кюреш бардырыу жаны бла арасыны баш врачы профессор Марина Иванова  пандемия салгъан къоркъууланы юслеринден хапарлагъанды. «Биз башха къыралланы сынауларына таянабыз, Москвада бла Санкт-Петербургда халдан хыйсап этебиз. Ауругъанланы саны ёсюп барады. Башха кезиуле бла тенгглешдиргенде, коронавирус жукъгъанланы саны 4-5 кереге терк ёседи. Аны бла байламлы саулукъ сакълау бёлюмге, артыкъда амбулаториялагъа, бек уллу ауурлукъ жетерикди. Стационарла да аны 2-3 ыйыкъдан сезерикдиле»,-дегенди.
 Ол айтханнга кёре,амбулатор службаны иши узакъдан бардырылыргъа керекди. Нек дегенде «омикрондан» ауругъанланы кёбюсюнде ол женгил ётеди.  Биринчи медицина болушлукъ берген бёлюм эмда «скорыйле»  женгил ауругъанлагъа бёлюнселе, медицина кадрла жетишмей къаллыкъдыла. Кол-центрле къурау, аланы цифрли амалла бла жалчытыу — ол къыйын болумдан къутулууну амалыды», - деп чертгенди врач-инфекционист.

  Аны оюмуна кёре, саусузла бла узакъдан ишлеу врачланы, башха медицина ишчилени да къорууларгъа да  боллукъд,  къыйын саусузлагъа кёбюрек эс бурургъа да онг чыгъарыкъды. 
  Профессор Иванова дагъыда коронавирусну жангы штаммы къуру абаданлагъа угъай, сабийлеге да къатылгъанын айырып айтханды. Аланы арасында саусузланы саны ёсеригине биз хазыр болургъа керекбиз»,-дегенди ол.

 КъМР-ни саулукъ сакълау министри Рустам Калибатов къаллай мадарла этилгенлерини юсюнден билдиргенди,  керек болса, госпитальлагъа саусузланы элтиуню маршрутлары да белгиленнгендиле, дегенди.
  Нальчикде 1-чи номерли поликлиниканы баш врачы Аулият Каскулова уа амбулаториялы бёлюмге чакъырыула 7-8 кереге кёбейгенлерин эсгертгенди. Аны бла бирге поликлиникада кол-центрде ишлегенлени саны да 12 адамгъа жетдирилгенди. Сатыу-алыу араладан биринде 1-чи номерли поликлиниканы пункту къуралгъанды. Ол экспресс-тестле бардырады. «Дарманла бизге келтирилгендиле, ол а  ишибизге уллу себепликди»,- дегенди  Аулият Каскулова.

Терк болушлукъ бергенни бла катастрофаланы медицинасыны арасыны таматасы  Алим Карданов да арт ыйыкъда аланы службаларына ауурлукъ ёсгенин чертгенди. Алай бюгюнлюкде Арада ишлегенле борчларын толтурургъа жетишедиле»,-дегенди. Аны оюмуна кёре терк болушлукъ берген службаны жаланда къыйын саусузлагъа чакъырылсала тынчыракъ боллукъ эди.

  Къабарты-Малкъарны Башчысы  «122» номери бла бир ара кёп да бармай ишлеп башларыгъын, ол районладан келген битеубилдириулени бирикдирлигин айтханды. Андан сора да, КъМР-ни Транспорт эмда жол мюлк министерствосунда Казбек Коковну буйругъу бла 100 микроавтобусу бла диспетчер служба къуралгъанды. Керек болса, ала да медучреждениялагъа жиберилликдиле.
Тюбешиуню ахырында Казбек Коков: «Быллай хал бир заманда да болмагъанды, ол себепден башха тюрлю амалла керекдиле. Биз анга хазырбыз. Жангы «толкъундан» къутулур ючюн барыбыз да къолубуздан келгенни аярыкъ тюйюлбюз»,-дегенди.

                                   

 

Юсюпланы Галина хазырлагъанды.
Поделиться: