Эл мюлкде къармашханлагъа хайырлы лаборатория

Бахсан районда агропромышленность бизнес-инкубаторда эл мюлк сферада тинтиуле эмда сынам ишле бардыргъан лаборатория барды. Ол саулай Шимал Кавказда бу жаны бла эм уллугъа саналады, дегендиле районну жер-жерли администрациясында.

Жаз башында сабан ишле башланырны аллында аграрийле анда кёп тюрлю диагностика ишлени тамамларгъа боллукъдула. Ол санда топуракъны къурамын тинтирге, эл мюлк продукцияны сакълар амалларын да сюзерге.

Саулай айтханда бу лабораторияда жюзден артыкъ тюрлю-тюрлю анализ этерге боллукъду. Эл мюлк товарла чыгъарыучулагъа аны специалистлери консультацияла бередиле. Бу арада шёндюгю оборудование барды. Ол программала бла эмда жангы тест-системала бла жалчытыныпды. Аланы хайырындан лабораторияда анализлени терк, тынгылы эмда ышаннгылы этедиле.

Лаборатория юч бёлюмден къуралады. Агрохимия секторда топуракъны, семиртгичлени, сууну, багъыу материалланы химия жаны бла тинтедиле. Фитопатология бёлюмню специалистлери битимлени аурууларын ачыкълау эмда аланы багъыу бла кюрешедиле. Анда дагъыда тахта кёгет эмда жемиш продукцияны къалай эмда неллай бир сакъларгъа боллугъун кёргюзтедиле. Молекулярный биология бёлюмде эл мюлк битимлени тирликлилигин азайтыргъа боллукъ вирус эмда бактерия аурууланы тинтедиле. Анда орнатылгъан оборудованияны хайырындан анализ жеринден кетмей олсагъат этиледи.

Былтыр бу лабораториягъа 1200 заявка берилгенди. Ол кеси да жаланда Къабарты-Малкъардан угъай, саулай Шимал Кавказдан. Аны специалистлери он мингден артыкъ гектар жерлени тинтгендиле.  

 

 

Улбашланы Мурат хазырлагъанды.
Поделиться: