Наркотиклени заранлыгъын эсгертгендиле

 Россейни Ич ишле министерствосуну Элбрус районда бёлюмюню къуллукъчулары Тырныауузда Отарланы Керимни атын жюрютген 1-чи номерли лицейни окъуучулары бла наркотиклени заранлыгъыны юсюнден дерс бардыргъандыла.

Акъылбалыкъ болмагъанланы ишлери жаны бла инспектор Бапыналаны Мадина шкочулагъа тютюн, наркотикле адамны саулугъуна салгъан заранны юслеринден айтханды. Ол наркотиклени асырагъаны, сатханы ючюн жууаплылыкъны да эсгертгенди.

Лицейни башчысыны юйретиу жаны бла орунбасары Наталья Ванатиева да къошулгъанды ушакъгъа. Ол наркомания, ичгичилик, тютюн ичиу битеу дунияда да жаш адамланы арасында кенг жайылып, уллу жарсыу болгъанын чертгенди.

- Бу уулу затла  жаш адамланы саулукъларына бютюнда къоркъуулудула, -дегенди ол.

 Тюбешиуню ахырында право низамны сакълаучула школчуланы спорт бла кюреширге, саулукълу жашауну жорукъларын толтурургъа чакъыргъандыла.

 

Тикаланы Фатима хазырлагъанды.
Поделиться: