Аллындан окъуна сакъ болургъа керекди

Коронавирус ауруу жайылгъан кезиуде жаз башында сабан ишлени къалай бардырыргъа боллугъуну юсюнден сёлешиннгенди Россейни Эл мюлк министерствосунда. Аны бла байламлы кенгешге регионлада АПК управленияланы, контроль-надзор органланы, эл мюлк предприятияланы, КФХ-ланы, жарашдырыучу предприятияланы келечилери къатышхандыла. Республиканы атындан анда КъМР-ни эл мюлк министрини орунбасары Тимур Вадахов болгъанды, деп билдиргендиле министерствону пресс-службасындан.

Жыйылыуда айтылгъаннга кёре, аграр бёлюмде коронавирус ауруу жайылмазча, бу ишни тындыргъанда битеу белгиленнген излемлеге эмда оноулагъа эс бурургъа керекди. Ол санда мекямлада бла транспортда профилактика жумушланы тамамларгъа, ишчилеге тынгылы къараргъа, арада байламлыкъланы да азайтыргъа тийишлиди.

Регионланы келечилери жер-жерледе эмда агропредприятиялада профилактика жаны бла не зат этилгенин билдиргендиле. Эл мюлк министерство алада ыйыкъ сайын мониторинг бардырып турлугъун да туура этгендиле.

Саулай айтханда, шёндю агропромышленность бёлюмде хал осал тюйюлдю, алай инфекцияны жангы штаммы терк жайылып башлагъаны уа аз-маз къоркъуу салады. Аны себепли регионлагъа профилактиканы кючлендирирге эмда ауруу чыкъгъан предприятиялада терк мадар этерге хазыр болургъа чакъыргъандыла.