Усталыгъы бла айырмалыды

Былай, сагъышланып къарасанг, Черек районда  врач Газаланы Алийни къызы Зухураны танымагъан, билмеген, аны аллына  медицина жаны бла себеплик излеп келмеген кёп адам жокъду. Ол  келген саусузгъа тынгылап, анализлерине тынгылы къарап чыкъгъандан сора да, пациент  терк аягъы юсюне болур,  жашаугъа ийнаныуун къайтартыр ючюн хайырлы багъыу амалны да тюз тохташдырыр. Ол  ишлерин сюйген, билген врачланы къауумунданды. Аллайла уа,  дарманладан сора да ариу тиллери, огъурлу , ышаннгылы сёзлери бла да багъа биледиле. Бошдан айтыла болмаз да: саусузну къулагъына ариу сёз шыбырдасанг окъуна- аны аурууну жартысын къурутдунг деп да. Зухра Алиевна уа огъурлу сёзлени  аллына келген саусузлагъа къызгъанмайды, ол аланы ат башындан да  айтмайды, ала  жюрегинден чыгъадыла. Хар бирине кесини ёз адамынача къайгъырады. Ол дагъыда аны болушлугъу  керек болса, кече-кюн демей жетеди. Адамла да анга бек ышанадыла.

      Врач усталыкъны да Зухура Алиевна жюреги жаратып сайлагъанды. Къашхатауда орта школну жетишимли бошап чыкъгъанлай, Къабарты-Малкъар къырал университетни медицина факультетине  киреди. 1987 жылда аны  къызыл дипломгъа бошап чыгъады. Къызны Ростовха ишлерге жибередиле.  Медицинада биринчи атламларын да  ол Ростов область больницада башлайды.  Жаш специалистни усталыгъын, хунерин, буюрулгъан борчну тынгылы тамамлагъанын эслеген, учрежденияны кардиология бёлюмюню тамата врачы Валентина Ивановна Сысоева  Зухураны кесини къолунда ишлерге чакъырады. Алай бла  таулу къыз сынаулу  врачны къатында кёп затха юйреннгенди. Бек башы уа - саусузланы  багъыу ишге. Жылны ичинде тынгылы сынам жыйышдыралгъан Зухураны кардиология бёлюмге башчылыкъ этерге саладыла. Газаланы къыз бюгюн да  юзмегенди биринчи юйретиучюсю бла байламлыкъны. Валентина Ивановнаны атын а не заманда да уллу  сюймеклик бла эсгереди

     Тёрт жылны  Ростовну  область больницасында ишлеп, туугъан эли Къашгхатаугъа  къайтханлай,  Газаланы къызлары район больницада ишге тохтайды. Багъыу учрежденияны ол  замандагъы баш врачы  Къарчаланы Азнорну жашы Хусей  Зухура больницагъа  келгенине бек къууаннган эди, алагъа  аллай билимли врачла бек керек эдиле. Анда ишлей, бир-бир жыллада  баш врачны къуллугъун да толтура келгенди, андан сора Зухура Алиевна  районда саулукъ сакълау бёлюмге башчылыкъ этгенди, ызы бла   Черек районну  медицина страхование фондунда врач-эксперт, Республикалы геронтология арада врач-терапевт, Огъары Малкъар элде  участка больницагъа да башчылыкъ этгенди. Бусагъатда  уа  район поликлиникада  функциональный диагностикада  (ЭКГ)    врачды. Зухура Алиевна  не заманда да бийик профессионаллыгъы, ишин тынгылы билгени,  саусузлагъа жюрегинден къайгъыргъаны бла айырмалыды.

      Зухура саулукъ сакълауда ишлегенли къыркъ жылдан атлагъанды. Анга да къарамай,  ол  билимин, усталыгъын ёсдюрюуге сакъды. Кесини  бай сынамын жаш  врачлагъа  къызгъанмай  бергенича, жыл сайын усталыгъын да  ёсдюреди. Бир заманда да эски болмазлыгъ а -эллилерини анга ышаныулары, сюймекликлери, даражасын бийикде тутууларыды.

      -Эллилерими ышаргъанлары, манга тюбегенлеринде салам бергенлери бек уллу саугъады,-дейди  Зухура Алиевна уа.