Поликлиника жангы излемлеге келиширикди

Жууукъ заманда Вольный Ауулда Будай улу атлы  орамда  34 мингден аслам адамгъа къарагъан поликлиника, жангыртылып, бюгюннгю излемлеге келиширча боллукъду. Анга   «Саулукъ сакълауну биринчи  болушлукъ берген бёлюмюн  игилендириу» федерал программагъа кёре былтыр  ремонт этилип башланнганды. Аны юсюнден КъМР-ни Саулукъ сакълау  министерствосуну пресс-службасындан билдиргендиле. 

Стационарны башы омакъ къанжал бла жабылгъанды. Жылытыучу системасы эм инженер коммуникациясы да алышындырылгъандыла. Бусагъатда мекямны ичинде  сюртюу-бояу ишле барадыла, полуна бла къабыргъаларына плитка салынады. Келир заманда сакъатлагъа эм башха онгсузлагъа да тынч болурча лифт ишлерикди эм пандус да тохташдырыллыкъды. 

Мекямны биринчи къатысында процедурала бардыргъан, къан алгъан, биринчи болушлукъ тапдыргъан  кабинетле орналлыкъдыла. Экинчисинде  бла  ючюнчюсюнде уа участковый врачла эм башха специалистле турлукъдула. Адамла бир бирлерине чырмамазча мадар этилликди, ол санда табаргъа тынч болурча навигация карта  жарашдырыллыкъды.   

Объект быйыл март-апрель айладан кеч къалмай битерге керекди. 

 

Магометланы Сулейман.
Поделиться: