Инвестициялы проектлени бардырыргъа танг себеплик

Россельхозбанкны Къабарты-Малкъарда бёлюмю былтыр республикада инвестициялы проектлени тамамлаугъа 317 миллион сом жибергенди. Буруннгу жыл бла тенглешдиргенде бу кёрюмдю сегиз кереге кёбейгенин билдиргендиле финанс учрежденияны пресс-службасындан.

Озгъан жыл банк дагъыда кезиулю сабан ишлени бардырыугъа 482 миллион сом жибергенди. Ол санда 269 миллион сом АПК-ны кредитле бла льгота халда онгдургъан программаны череклеринде бёлюннгенди. Аны жыллыкъ ставкасы беш процентден озмайды. Тергеулеге кёре быйыл быллай ишлени тындырыргъа 300 миллиондан аслам сом берилликди.

Кредит алыргъа заявкаланы эл мюлк предприятияла, элчи-фермер мюлкле, энчи предпринимательле да бередиле. Ала ахчаны асламысында техникагъа керекле, отлукъ, урлукъла, семиртгичле сатып алыргъа эм башха жумушлагъа къоратадыла. «Республикада кезиулю сабан ишлени кредитле бла жалчытыуну юсюнден айтханда банк мында ал жерни алады. Аны бла ол агропромышленность комплексге иги себеплик этеди дерчады. Берилген ахчаны хайырындан элчиле мюлклеринде кёп тюрлю жумушланы тындырадыла, техника онгларын игилендиредиле, урлукъ себиу эмда тирлик жыйыу ишлеге тынгылы хазырланадыла», - дегенди бёлюмню башчысы Алим Сокуров.

Улбашланы Мурат хазырлагъанды.
Поделиться: