Сакълыкъгъа чакъыргъанды, жорукъланы эсгертгенди

Эски Жангы жылны байрамында «Полициячы Къар Аппа» школчулагъа къышда жолда къоркъуусузлукъну жорукъларын эсгертгенди. Бу жол акция Черек районда болгъанды.

Жолда жюрюуню къоркъуусузлугъуну инспекторлары Бабугентни орта школуна къонакъгъа баргъандыла. Полициячыла окъуучулагъа къышда жолда бютюнда сакъ болургъа, жорукъланы сакъларгъа, машинала жюрюген жерлени тийресинде ойнаргъа жарамагъанын эсгертгендиле. Дагъыда кече ала жолда кёрюнюрча кийимлеринде светоотражательлени жюрютюрге чакъыргъандыла.

Полициячыла Къар Аппа бла бирге сабийлеге жолда жюрюуню жорукъларын, светофорну, башха жол белгилени магъаналарын къалай ангылагъанларын  ачыкълар мурат бла конкурс да къурагъандыла. Бу оюннга школчула бюсюрегенлерин, тюз жууапланы терк бергенлерин айтырчады.    

Ахырында школчулагъа светоотражательле юлешиннгендиле. Окъуучула аланы жюрютюрге, жолда жорукъланы сакъларгъа сёз бергендиле.