Зарагижде ГЭС-ге – беш жыл

Беш жыл мындан алгъа – 2016 жылда 29 декабрьде Зарагиж ГЭС ишлеп башлагъанды. Бу объект Тёбен-Черек ГЭС-лени къауумунда ючюнчю болгъанды. Аны хайырындан республиканы районларын электрокюч бла жалчытыныу бютюнда игиленнгенди, деп белгилегендиле РусГидро компанияны Къабарты-Малкъарда бёлюмюнде.

Зарагиж ГЭС-ни кючю 30,6 мегаваттды. Бир жылны ичинде ол 114 миллион киловатт-сагъат ток чыгъарады. Биринчиден аны проектине кёре 15,6 МВт кючлю гитче станция ишлерге умут бар эди. Алай артда къагъытларын жангыдан жарашдырып, 28,8 МВт этгендиле, къурулушун бардыргъанда уа 30,6 МВт-гъа жетдиргендиле.

 Бу станцияны энчилиги – аны баш жанында кёл жыйылмайды. Суу ары башындан уллу быргъыла бла къызынып келеди эм ток чыгъаргъан турбиналаны чархларын бурады. Алай бла бу объект экология жаны бла къоркъуусузлукъну эм бийик излемлерине келишеди.

Зарагиж ГЭС-ден сора сагъынылгъан Тёбен-Черек къауумгъа Аушигерде бла Къашхатауда станцияла киредиле. Ала ючюсю да Къабарты-Малкъарда эм уллу энергетика комплексге саналадыла.

Черекден бёлюннген суу Къашхатауда ГЭС-ни огъары жанында юзмезден тазаланады, ызы бла быргъыла бла станциягъа барады. Андан чыкъгъандан сора деривация арыкъ эмда тоннель бла Аушигерде станциягъа келеди. Аны да турбиналарын ишлетгенден сора энишге – Зарагижде ГЭС таба кетеди. Алай бла сууну къайтарып тазаларгъа керек болмагъаны ючюн, бу каскадны файдалыгъы бютюнда иги болады.

Улбашланы Мурат хазырлагъанды.
Поделиться: