«Эльбрус» курортха баргъан жолну ырхыладан къоруулайдыла

Къабарты-Малкъарны ичи бла баргъан Прохладный–Баксан–Эльбрус А-158 федерал жолну узунлугъу 104 километрди, аны 19 участкасы къоркъуулу жерлеге саналадыла. Жауунла уллу жаугъан кезиуде, суу кётюрюлюп, ырхыла да келип, жолланы бузуучудула. Аны бла байламлы жоллагъа къарагъан «Кавказ» федерал казна учреждение Тырныаууз шахар, Быллым, Бедик, Огъары Бахсан, Элбрус эм Нейтрино эллени тийрелеринде ырхыладан къоруулагъан, битеу да алты километр узунлугъу болгъан бетон къабыргъала сюегенди. Аллай къоруулаучу къабыргъала «Иткол» пансионат къатында, Нарзанла таласында эм «Горняк» деген дачала  орналгъан жерледе да бардыла.

Къоруулаучу къабыргъаны эм узун 750 метр болгъан жери Тырныауузну бла Огъары Бахсанны ортасындады. Ишле бардырылгъан кезиуде ырхыла жуугъан жерлеге 9 метрден тебиреп 18 метрге дери сегиз минг бла жарым ичлери бетондан толгъан энчи сваяла урулгъандыла. Ишленнген къабыргъаланы къошакъ халда къорууларгъа деп, жарым метр бийиклиги болгъан темир эм бетон къатышдырылып этилген чыпынла турадыла.  

Дагъыда озгъан жылда Р-217  «Кавказ» федерал жолну жыйырма юч километрин эки полосадан тёрт полосагъа дери кенгертгендиле. Куба-Таба элден тебиреп Псычох элге дери автомашинала  жюрюген жол эркин болгъанды. Быйылгъы жылда да Прогресс элден тебиреп Куба-Табагъа дери 7,5 километр узунлугъу болгъан жол кенгертилликди. Ремонт ишле 2023 жылда бошаллыкъдыла.  

Андан сора да  башда сагъынылгъан А-158 федерал жолну 13 километрине тынгылы ремонт этилгенди. Аллай ишле Исламей бла Алтуд элледе да бардырылгъандыла. Жанхотия элден тебиреп Бедикге эм Дыгулыбгейден Экинчи Чегемге дери асфальтны юсюне къоруулаучу материал салыннганды. Ставрополь край бла чекде Малка сууну юсю бла баргъан кёпюрге тынгылы ремонт этилгенди. 2022 жылны ахырына дери республикада автомобиль жолла баргъан жерледе ишленнген алты жалгъан объект жангыртыллыкъды, ол санда Чегемде жер тюбю бла ётген жол, деп билдиргендиле жоллагъа къарагъан «Кавказ» федерал казна учрежденияны пресс-службасындан.

Бизни корр.

Поделиться: