Сабийлени жокълау ариу тёреге бурулгъанды

«Энчи жумушланы толтургъан Къар Аппа» ведомстволу акцияны чеклеринде Росгвардияны КъМР-де Управлениясыны «Вершина» отрядыны къуллукъчулары Прохладныйде сабийле тургъан интернатда къонакъда болгъандыла. Аны юсюнден бизге ведомствону пресс-службасындан билдиргендиле.

Кюч структураны келечилери жашчыкъланы бла къызчыкъланы эмда аланы устазларын жангы жылгъы байрамла бла алгъышлагъандыла. Гвардиячыла саугъагъа интернатха керекли техника келтиргендиле эмда сабийлени татлы ашарыкъла бла сыйлагъандыла.

- Сабийлени жокълау ариу тёреге бурулгъанды. Ата-ана жылыусуз ёсген хар бала да жашауда кеслери аллына къалмагъанларын, ала ючюн жарсыгъанла болгъанларын ангыларгъа керекдиле, - деп белгилегенди акциядан сора полицияны полковниги Байсыланы Мухтар.